WAN - Îdarekars Arsîsa Evîndar Akbulut derheqê hêrişê hemverê ziwanê kurdkî de qisey kerd û vat: “Polîtîkayê şerê taybetî yê îqtîdarî her roje bi hawayê cîya dewam kenê. Sey şar wezîfeyê ke keweno milê ma ser, ganî ma ca bîyarê, her tim û her cayî de kurdkî qisey bikerê û cuya xo kurdkî dewam bikerê. Bi qiseykerdişê kurdkî, do hêrişî bêrê bêtesîrkerdiş.”

 

Bi serran o îqtîdar hemverê kurdan de polîtîkayê înkar, îmha û asîmîlasyonî keno. Îqtîdar bi yew zîhnîyet û yew ziwanî dewam keno. 24ê êlule de Amed de hemverê Komeleya Ziwan û Kulturî yê Mezoptamyaye (MED-DER) Payîz Pirtûk û Koperatîfê Pewerdeyîyê Ziwan û Hunerî yê Ankayî de sereştiş bî û 30 kesî destbend bî. 29 kesî dimayê îfadeyî bi şertê kontrolê edlî serbest ameyî veradayîş û hemserekê verî yê MED-DERî Rifat Ronî tepişya. 

 

Îdarekara Merkezê Cigêrayîşê Ziwan, Kultur û Hunerî yê Arsîsa yê Wanî Evîndar Akbulut derheqê hêrişan de qisey kerd.

 

‘Şarê kurdî xoverdayîşê xo roj bi roje xurt keno’

 

Evîndare dîyar kerd ke hêrişê hemverê kultur û ziwanê kurdî parçeyêk polîtîkaya asîmîlasyonî yê û vat: “Bi serran o hewl danê ke kultur, ziwan û şarê kurdî çin bikerê. La xoverdayîşê şarê kurdî roj bi roje xurt beno û şar wazeno ke bi ziwanê xo biciwîyo. Seba ke wazenê nê xoverdayîşî biqedênê hêrişê sazgehê ma kenê. Bi nê hêrişan wazenê ke kurdî biqedîyê.”

 

‘Ma do xo ver bidê’

 

Evîndare dewam de wina vat: “Demêk nêzdî de nuşteyê seba derbazbîyayîşê peyayan yê ‘pêşî peya’ amebî pakkerdiş. Dima ra hêrişê ciwanê ke govende kerdibî. Wazenê kulturê ma çin bikerê la ma hemverê nînan de sere nêtewênenê û xo ver danê. Senî ke  bi seserre yo ma xo ver danê, ma do tîya ra tepîya zî xo ver bidê. Wezîfeyê ke keweno milê ma ser, her tim qiseykerdişê kurdî yo. Ganî ma xebatanê xo her cayî de dewam bikerê. Ma her wareyî de kurdkî qisey bikerê û bidê qiseykerdiş.”