Nazlican Nujîn Yildiz

 

ÎZMÎR - Komeleya Her Ca Tutî ra Psîkologe Hatîce Goz derheqê qetilkerdişê Narîn Guran û polîtîkaya tutan ê welatî de qisey kerd û vat, Tirkîya de polîtîkayêke hemverê tutan est a. Hatîce ard ziwan ke dimayê qetilkerdişê Narîne rastîyê pey perdeyî vejîyayê werte.

 

Narîn Gurana 8 serrî ke dewa Çulî ya Rezanî ya Amedî de 21ê Tebaxe de vînî bîbî û 8ê êlule de çemê Egertutmaz de qetilkerde ameye vînayîş. Goreyê raporê ATKyî yê Stenbolî Narîne ameya fetisnayîş. Netîceyê cipersayîşî de keyeyê aye zî mîyan de 12 kesî ameyî tepiştiş.

 

‘Tutî sey şexs nînê vînayîş’

 

Hatîce vat, awanbîyayîşê zemînê desteştişê hemverê tutan de netîceya hêrsê pîlî ya komelî vejêna werte û wina vat: “Qetilkerdişê Narîne, nimûneyêk o. Narîne ne yê ewilî ya û ne zî peynî ya. Narîne dir çîyê ke ma verê vatêne, ancî rî dayî. Ewnîyayîşêke hemverê tutan est o. No her çî wey keno. Şeklê dayîşê xeberan. Nêzdîbîyayîşê hemverê Narîne, hemverê mergê aye, hemverê kiştoxan, ewnîyayîşê hemverê tutanê bînan. Nê zî polîtîkaya hemverê tutan qewimyenê.”

 

Tedayê dewe zêde bî

 

Hatîce dewam de wina qal kerd: “Dewe de serdestîya camêrdan zêde ya û cinî û tutî nê bi hawayêkê tewr giran hîs kerdê. Bi merdişê Narîne dir na teda di û hîrê qatî zêde bîya. No bi rastî çîyêk bi xof o, seba cinî û tutan. Na nuqta de ganî paştdayîş bêro pîlkerdiş goreyê mi ra. Merdim eşkeno cinî û tutanê uca dir bêro têhet û sohbet û qisey bikero. No muhîm o. Belkî paştdayîşê psîkolojîk zî seba înan baş bibo.”

 

Binpaykerdişî se ra 500 zêde bîyê

 

Hatîce dîyar kerd ke tutanê kurdan tena seba kurdbîyayîşê xo xeylêk çîyan dir yenê rî bi rî û wina vat: “Tirkîya de binpaykerdişê heqanê tutan û desteştiş se ra 500 zêde yo. Nîjadperestî vernîya tutîtî gêno. O êdî tut nê, kurd o, sûrîyeyîj o. Ma pêro wazenê ke tutî têduştî biciwîyê, azad biciwîyê. Ma do têkoşînê xo nê hetî ra bikerê.”