Pelşîn Çetînkaya

 

AMED - Cinîyê ke ‘Pêvînayîşê Keda Cinîyan’ de ca girewtî, dîyar kerdî ke seba dikanê înan çin ê, pêvînayîş de berardişê xo roşenê û îstîhdamê xo awan kenê.

 

Kurdistan û Tirkîya de seba krîzê ekonomî komel her ke şino tewr feqîr beno. Amed de şaredarîyê DEM Partî seba cinî berardişê keda destê xo biroşê ‘pêvînayîşê keda cinîyan’ pê anê. Mudirîyê Xizmetê Cinî û Keyeyî yê Şaredarîya Peyasî 5ine pêvînayîşê keda cinî pê ardî. Pêvînayîşo ke hewte ra reyke pê yeno, saete 19ine de dest pêkeno û cinî standan de cil û belgan, solan, çenteyan, werdê ke viraznenê roşenê. Eynî emrî ra kesî yenê têhet, bi şayî derbaz kenê. 

 

‘Ma wazenê nê bernameyî dewam bikerê’

 

Ruken Bulute wina qal kerd: “Seba paştdayîşê keyeyê xo ma ameyî tîya. Ma berardişê xo tîya roşenê. Ma hevalanê newe xo rê viraznenê. Ez kesê cîya tîya nas kena. Eynî wextî de paştdayîşêk est o. Ma tîya werdê xo roşenê. Ma seba tutan zî werd viraznenê. Ganî bernameyê wina dewam bikerê. No seba averşîyayîşê merdiman baş o.”

 

Kîrayê dikanan zêde yo

 

Gulserene zî vat, papik û cil û belgan derzena û wina dewam kerd: “Semedo ke kîraya dikanan zêde ya, ma tîya berardişanê xo roşenê. Dewlete hetkarî nêdana. Ma bi zorî debare kenê. Cinî tîya keyfweş ê. Ez înan pîroz kena. Şaredarî hetkarî dana ma. Ca dana ma. Kursan akenê. Ma pêro tîya hevaltî danê ro. Ma şaredarîya xo ra razî yê. Ganî cinî serê linganê xo de vinderê. Ganî bernameyê wina dewam bikerê.”

 

‘Semedo ke ameya tîya tutê mi zî keyfweş ê’

 

Mevlude Kaya zî wina vat: “Verê zî ma muracatê şaredarî kerdibî. Wexto ke ma xo ra bawer bê, tutê ma zî xo ra bawer ê. Çîyo ke mi ardê tîya, pêro keda min ê. Rewşa ma ya ekonomî baş nîya. Ma do heta key destê camêrdan biewnê. Xora kar çin o. Ganî ma hewl bidê. Ma îmkanê karî wazenê.”

 

Nursel Satik zî dîyar kerd, kênaya xo dir çenteyan û  berardişê xo yê bînî roşenê û wina vat: “Ma borekan viraznenê. Ma çente û tîşortan viraznenê. Kênaya mi çenteyan viraznena. Ma tîya roşenê. Seba ma baş o. Ma tîya yewbînan nas kenê. Nê ma aver benê. Ez wazena nê bernameyî dewam bikerê. Ma tîya şuxilênê û bawerîya ma zêde bena.”