AMED - Sazgehê kulturî yê bajarî, MED-DERo ke polîsan berê ci şikina û îdarekarê ci destbend kerdî, akerdî û bi sernameyê “Qirkerdişê Kulturî” derse dayî. 

 

Çarçewaya cipersayîşêk Serdozgerîya Komare ya Amedî ya serra 2022ine de daya destpêkerdiş, polîsan eşt serê awanîya Komeleya Cigêrayîşê Kultur û Ziwanê Mezopotamyaye ( MED-DER), Payîz Pirtûk, Kooperatîfê Perwerdeyî yê Ziwan û Hunerî û xeylêk keyeyan. Sereştişê keyeyan de xeylêk kitabî û kovarê kurdî, hard-dîskê komputeran û meteryalê dîjîtalî ameyî desteserkerdiş. 

 

Sazgehê Amedî ke xebatê kultur û hûnerî kenê, MED-DERo ke berê ci ame şikinayîş û xeylêk îdarekarê ci ameyê destbendkerdiş, seba paştdayîşê MED-DERî bi wesîleya paştdayîşî derse dayî. Dersa ke Ma Music, KASED, Tîyatroyê Bajarî yê Amedî û Komeleya Sînemaya Rojhilatê Mîyanên dayî, sereştiş û destbendkerdişî ameyî şermezarkerdiş. 

 

'Kurdan ziwanê xo yê dayîke pawitî'

 

Dersa awanîya MED-DERî de ameye dayîş de babeta ewil bi “Qirkerdişê Kulturî” bî. Sereka KASEDî Salîha Ayata dersa ewilî da û wina vat: “Seke şima zî zanê, hevalê ma ameyî destbendkerdiş. Ziwanê kurdkî pêwa ke ziwano fermî nîyo, pêwa ke ziwanê nuşteyî nîyo, xo pawit û heta roja ma ame. Seba nê têkoşînêk pîl ame dayîş. Her çiqas îqtîdarî vajê ke ziwanê kurdî ser o qedexe çin o zî Tirkîya de tîpê x,w,q,ê qedexe yê. Kurdan, Feqiyê Teyran ra heta ewro ziwanê xo yê dayîke pawit. Ma sey kesê xebatê kulturî de ca gênê do qelema hevalanê xo yê destbendkerde erd de nêverdê.”