Gulîstan Gulmuş

 

AMED - Kiştox Mehmet Demîrhano ke Hîlal Kar qetil kerd, 3 aşmî yo nîno tepiştiş. Waya Hîlale, Ebru Kar dîyar kerd ke ganî tewr lez kiştox bêro tepiştiş û cezakerdiş wina vat: “Ez nêwazena waya mi bêro xovîrrakerdiş, ez nêwazena no reyke bîn ancî bibo. Ma pabeyê paştdayîş ê.”

 

Yew sebebo tewr pîl ê zêdebîyayîşê şîdetê camêrdî bêcezaverdayîş o. Seba bêceverdayîşî her roje cinî yenê qetilkerdiş, yan zî şîdet înan rê yeno kerdiş. Goreyê bîlançoyî şîdeto ke ajansê ma dayeyê aşma Tebaxe arêdayî, tenê aşmêke de 31 cinî û 5 tutî ameyî qetilkerdiş û 15 cinî û 3 tutî zî bişik dinyaya xo bedelnayî. Netîceya nê bêcezaverdayîşî de Hîlal Kar hetê Mehmet Demirhan ke mehrê dînî ey dir zewicnayebî, bi çeke ameye qetilkerdiş. Hîlale 23ê Hezîrane de Taxa 5 Nîsane ya qezaya Rezanî ya Amedî de ameye qetilkerdiş. Pêwa ke 3 aşmî derbaz bîyî zî hema sûcdarê ke Hîlale qetil kerdê nêameyê tepiştiş. Waya Hîlale, Ebrû Kar ajansê ma rê qisey kerd, waşt ke tewr lez kerdox bêro tepiştiş û cezaya lazimî bêra dayîş.

 

'Kiştoxî aye berd cayê ke kamera uca çinîbî’

 

Ebrûye dîyar kerd ke Hîlale demê fekveradayîşî de dest bi kar kerda û hetê ey ra ameya tacîzkerdiş û wina vat: “Ma o wext aye ra vat, gerre bike la waya  mi seba tuta xo tersa û nêverda. Rojêke vernîya kiştişî ancî şina cayê karî û vana, “Meşuxilî”. Waya mi dimayê munaqeşeyêk qij, ey şirawena. Nêzana roja hedîse telefon kerda yan nê, la verê berî de vinderta. Goreyê şahidê hedîse, ê demêk rayîr ra şîyê û hêrişkar bi zanebîyayîş aye berdo cayêk kamera çin a. Aye beno kuçeyê 798. Uca de demêk qiseykerdişê xo dewam kenê. Kesê ke bîyê şahidê a hedîse zî est ê. Çi heyf înan demêk ci temaşe kerd. Badê cû hêrişkar çeke vejeno. Waya mi reyke de dana destê ey ro û çeke ginena erd ro. Sûcdar ancî çeke gêno û wexto ke waya mi agêrena, pey ra gule erzeno. Wexto ke vîneno waya mi nêkewena, guleyêk bîn zî erzeno. Waya mi cayê hedîse de yena kiştiş.”

 

'Heqê kesî çin o ke cuya kesî bigîro’

 

Ebrûye dewam de wina vat: “Waya min û cinîyê bînî ke yenê qetilkerdiş, wêranîyêk pîl pey xo de verdenê. Warzaya mi, mi ra pers kena çira heta nika sûcdar nêameyo vînayîş. Ez nêeşkena cewab bidî. Semedo ke ez nêeşkena muxatabêk bivînî. Ma wazeno kiştox bêro tepiştiş û cezayêk giran bigîro. Ez semedê komelî eşkena wina vajî: Waya mi ameye qetilkerdiş. Ma wayîrê fehmêk wina cîya de yê ke ganî ez mergê waya xo bingehêk maqûl ser de wijdanê merdiman rê verdî. 'Waya mi semedo ke şuxilyayîne ameye kiştiş'. Ganî ez nê çî nêvajî. Heqê tu kesî çin o ke cuya kesêk destê înan ra bigîro. Hin cinî zî bi zîhnîyetê camêrdan fikrîyenê. Ma wazenê ke ê zî fam bikerê ke kesêk ma bîn çin o paştdayîş bido ma. Ganî ma paştdayîşê yewbînan bikerê. Semedo ke êdî tu kes wina nêbo.”

 

Tewr peyîn Ebruye dîyar kerd ke aye nêwazena waya ci bêro xovîrrakerdiş û vat, ganî na hedîse rojeve de bimano.

 

Waştişê wa kiştox bêro vînayîş

 

Heto bîn ra prosesê huqûqî yê derheqê qetilkerdişê Hîlal Kar dewam keno. Dosyaya Hîlale heta nika verê dozgerê nobedarî de bî. Goreyê agahîyê ke hetê avûkata Hîlale, Eda Kar Burakmak ra ame dayîş, dosya newe ra sewqê dozgerê serekeyî ameya kerdiş. Sewbîna ame vatiş ke çarçewaya dosya de ameyo waştiş ke pêro delîlê derheqê cînayetî de bi baldarî bêrê komkerdiş, îfadeyê şahidan bi hawayêkê hîra û bi temamî bêro girewtiş û cayê kerdoxî bêro dîyarkerdiş."