Derya Ren

 

DÎLOK - Guler Yildirima ke dimayê erdlerzê serra vîyarte hema konteynir de ciwîyena, vatişê selahîyetdarê TOKÎyî ard vîr û vat: “Erdlerzî de merdimayî nêverdayî.”

 

Yew bajaro ke erdlerzî ra tesîr bî Dîlok bî. Dîlok de 3 hezar û 945 kesî dinyaya xo bedelnaye, bi des hezaran birîndar bîyî û 25 hezar awanî ameyî sewîyeya ke nêeşkê bêrê şuxilnayîş. Xisarê erdlerzî hema Dîlok de yeno vînayîş. Pêwa ke nêzdîyê di serran o serê erdlerzî ra derbaz bîyo, welatijî hema çadir û konteyniran de ciwîyenê. Qezaya Avasîmî yê Dîlokî de dewa Haltanli de keyeyê Guler Yildirim (55) rijîya. Dimayê erdlerzî konteynir dayî û hema konteynir de manena. Gulere dîyar kerd sozê ke ameyê dayîş hema ca nêameyê.

 

‘Hema konteynir de ciwîyena’

 

Gulere vat, erdlerz de keyeyê ci rijyayo û wina dewam kerd: “Ma bi îmkananê xo, mêrdeyê mi vet. Selahîyetdarî zaf erey ameyî. Heta ameyî ma bi hewldayîşê xo birînanê xo tewêna. Ma aşmêke zêdeyêr o bereqeyan de ciwîyenê. Ma bêwerd mendî. Serd bî, zimistan bî. Pêwa hende dem derbaz bî, ma nika konteyniran de yê.”

 

‘Bajaranê Kurdistanî ra hetkarî zêde ameye’

 

Gulere qiseykerdişê xo wina dewam kerd: “Bajaranê Kurdistanî ra hetkarî zaf zêde ameye. Dewlete do TOKÎ bidayîne ma. La heta nika tu averşîyayîş çin o. Ma hema konteyniran de manenê. Keyeyê tutanê ma rijîya. Ê zî kîra de mendî. Hetkarî teber ra ameye, pêroyî vila nêkerdî. Ma dewijan seba kêmîyê malzemeyan, qelbê yewbînan şikina. Ma kewtî dore çadire. Wa kes nêvajo zûr o.”

 

‘Bi rojan ma derman nêkerd’

 

Gulere tewr peyîn wina vat: “Mêrdeyê mi binê xirbe de mend. Ma bi hewldayîşê xo vet. Çokê ey şikiyabî. Bi rojan ma dermankerdişê ey nêkerd. Kurdistan ra doktorê zerrîwazî ameyî û birînanê ma rê bîyî derman. Ma bi dermananê înan derman bî.”