WAN - Cinîyê ke mêrdeyê înan merdê yan zî zîndanan de yê, tutanê xo dir awanîyê Kuveytî de manenê. Cinîyê ke nê awanîyan de ciwîyenê, tehlukeyê înan yê cuye est o. Cinîyan dîyar kerd ke sey cinî probleman ciwîyenê û vatî: “Gaz, market, resnayîş çin o. Ganî bêrê tîya û problemê cinîyan û tutan bivînê. Serekkomar çira tîya nêvîneno? ÎHH tehdîdê ke ma bierzo keno.”

 

Wan de 2014ine de hetê Weqfê Heqê Merdiman û Hetkarê Merdimayî (ÎHH) seba keyeyê ke erdlerz ra tesîr bîyî, binê nameyê Awanîyê Kuveytî de bi pêroyî 64 awanî ke 4 blokan ra pê yenê, sîteyêk viraşt. Cinîyê ke mêrdeyê înan merdê, yan zî tepişte yê, tutanê xo dir nê awanîyan de ciwîyenê. Awanîyê ke  merkezê bajarî ra dûrî yê, kesê ke uca ciwîyenê, şertê îzolasyonî de ciwîyenê.

‘Gaz, market, resnayîş çin o’

 

Îlayda Yancar wina qalê probleman kerd: “Yenê tîya vanê ma do probleman çarser bikerê. La yew problem zî çareser nêkerdî. Cayêk nêzdîyê marketî çin o.  Zimistanî resnayîş zehmet o. Şaredarê ma çend rey ame. Vat, ma do probleman çareser bikerê. Wa vengê ma bêro eşnawitiş. Tîya de gaz çin o, market çin o, resnayîş çin o. Dinge ma ra dûrî ya. Wexto ke nêweşê ma bibê ma şêrê, ma nêeşkenê vejîyê. Ma nêeşkenê tutanê xo bêîmkanî bidê wendiş. Wa her kes rewşa ma bivîno. Yê ke newe yenê tîya, mecbûr manenê bimanê. Ma problemê gazî ciwîyenê. Her tim komir û kolîyê ma çin ê.”

 

 

‘Serekkomar çira ma nêvîneno’

 

Cinîya bi nameyê Fatma Tarhan zî derheqê probleman de wina vat: “Ne marketêk est o, ne zî çîyêk bîn. Ma dingêk verê keyeyê xo de wazenê. Tutê ma şertê zor û zehmetî de şinê mekteb. Komir çin o. Lazimîyê ma est ê. Kes hetkarî nêdano ma.  Serekkomar her çî vîneno, çira tîya nêvîneno. Tutê ma şan de tarîtî de yenê û tersenê. Zimistan zehmet o. Tutê ma wazenê biwanê la ma nêeşkenê bidê wendiş. Wa hetkarî bidê ma.”

 

Tehdîdê ‘Ma do şima keye ra bierzê’

 

Cinîyê ke nêwaştî nameyê xo bidê wina vatî: “Qet nêbîne kamera bibayîne. Resnayîş zaf zehmet o. Dinge dûrî ya. Market çin o. Seba nanêke ganî ma 15 lîra pereyê rayîrî bidê. Zimistanî semedo ke market çin o, ma nêeşkenê çîyêk bigîrê. Seba tehdîdê do ma keye ra bierzê, ma nêwazenê qisey bikerê.”