MERKEZÊ XEBERAN - Pîyê Jîna Emînî neql kerd ke heqê înan ke her serre bi merasîmêk goreyê adetî û metodê dînî kênaya xo yad bikerê. Eke sey serra vîyarte rejîmê Îranî astengî nêvejo, do roja yewşeme merasîmêk bêro organîzekerdiş.

 

Serrgêra qetilkerdişê Jîna Emînî û destpêkerdişê serewedaritişê ‘Jin, Jiyan, Azadî’ yê 16ê êlule serra 2022yîne ke seranserê dinya de vila bî, nêzdî beno. Na çarçewa de vengdayîşê seba grevê pêroyî û çalakîyê bi wesîleya 2yîne serrgêra şorişî dewam kenê.

 

Pîyê Jîna Emînî Emced Emînî, derheqê organîzekerdişê merasîmê diyîn ê serrgêra qetilkerdişê kênaya xo hetê rejîmê Îranî ra Radyoyê Ferda rê qisey kerd.

 

Emced Emînî neql kerd ke eke hukmatê Îranî sey serra vîyarte zorî û astengî nêvejo, serê pêşnîyazîyê şarî do roja yewşeme (15ê êlule) merasîmê serrgêra qetilkerdişê kênaya xo organîze bikerê.

 

Dewamê qiseykerdişê xo de Emced Emînî wina vat: “Ma keyeyê Jîna Emînî, sey her keyeyêk Îranî yê zerrîgiran, hes kesûkarê xo yê koçkirî kenê û heqê ma est o ke merasîmê goreyê adetî û yadkerdişê dînî yê serrane seba kênaya xo organîze bikerê.”