WAN- Cinî derheqê qetilkerdişê Narîn Gurane de qisey kerdî û vatî: “Nê qetilkerdişî de engişta dewlete est a. Tuta qije vera kursê Kuranî şirawitê komeleya Hîzbullahî. Dedê aye yê tepişte HUDA PARij o.”

 

Cenazeya Narîn Gurana 8 serrî ke 21ê Tebaxe de taxa Çûliye ya qezaya Rezanî ya Amedî de vînî bî,  8ê êlule de Çemê Egertutmazî de bi qasî 2 kîlometreyan dûrê taxe de ameye vînayîş.Pêwa ke bi desan rey ê çemî de xebate ameye kerdiş, cenaze nêamebî vînayîş. Qetilkerdişê Narîne hema nêameyo zelalkerdiş û şikdarî zî pêro nêvejîyayî werte.

 

Kurdistan û Tirkîya de reaksîyonê hemverê qetilkerdişê Narîne dewam kenê. Cinîyan reaksîyon vera qetilkerdişî mojnayî û bale antî dewlet ser û HUDA PARî.

 

‘Şirawitişê komeleya Hîzbullahî’

 

Endama Meclîsê Dayîke Aştîye ya Wanî Hurşît Turgut wina vat: “Vera kursê Kuranê şirawitê komeleya Hîzbullahî. Dimayê tute kurs ra vejêna, tute qetil kenê. Homa nê qebûl nêkero. Na hedîse de destê dewlete est o.  Mamê aye HUDA Parij o. Dewlete dest da serê hedîse û nêverda cigêrayîş bêro kerdiş. Cayê ke Narîne ci de amebî vînayîş verê  bi desan rey cigêrayîş ci de amebî kerdiş. 19 rojan a tute vînî bî. Wexto ke çîyêk bîn beno bierzê 100 çale zî dewlete vînena û vejena werte. 19 rojî senîn beno Narîne nîna vînayîş. Heqê Narîne namûsê ma hemin o. Ma heqê xo nêdanê tu kesî. Parlamenterê AKPyî wayîrê keyeyî vejêno, paştdayîş dano. Nêverdeno kes derheqê babete de qisey bikerê.”

 

‘Tuta ameye qetilkerdiş tuta ma pêrûne ya’

 

Endama Meclîsê Dayîkê Aştîye Besna Aydogan zî dîyar kerd ke yê Narîne qetilkerdiş wijdanê înan senîn qebûl kerdo û wina vat: “Na hedîse de dewlete zî est a. 19 rojî bî geyrayîne. Vernîya ci di rey çemî de cigêrayîş amebî kerdiş. Tutêka dayîka aye wayîrê ci nêvejîyaya est a. Wa dayîka aye wurzo serê lingan û seba kiştoxê kênaya xo têkoşîn bikerê. Wa hesab kiştoxan ra bipersê. Tuta ke ameye qetilkerdiş ya pêrûne bî.”

 

Hemsereka DBPyî Rêya Armûşî Dîlan Çelîk zî wina vat: “Sîstemo ke tehemulê ci tut, heywan û xoza rê nêmendo vînî kerdo. Çi heyf na rey ma qetilkerdişê Narîne dir ameyê rî bi rî. No dejêk pîl o. Sey dayîkêke ez xemgîn a. Ganî reyke bîn çîyêk wina nêbo. Tutê ma ameyoxê ma yê. Sîstemêk şikdaran paweno.”