AMED- Şaredarîya Amedî ya Şaristanê Girdî seba ke cuya cinîyan asan biko xebata JINKART dabî destpêkerdene û na karte rê 8 hezar û 820 cinîyan muracaat kerd.

 

Hetê Serekîya Daîreya Xizmetanê Cinî û Keyeyî ra seba ke cuya rojane ya cinîyan asan biko xebata JINKART do bêro caardiş û seba nê tetbîqî vermuracaatî ke 26ê Tebaxi de înternet ser o dest pêkerdbî, 9ê Êlule de qedîyayî. Vermuracaatan de merkezê bajarî û qezayanê teberan ra 8 hezar û 820 cinîyan muracaat kerd.

 

Vermuracaatê ke seba JINKART ke do cinîyanê 18-64 serreyî yê ke ameyeyê înan çin o, înan rê bêro dayene, ameyî girewtene, hetê komîsyonê ke Serekîya Daîreya Xizmetanê Cinî û Keyeyî, Serekîya Daîreya Çapemenî, Weşanî û Têkilîyanê Şarî, Serekîya Daîreya Xizmetanê Sosyalan, endamê meclîsê şaredarîye û şaredarîyê qezayan tede ca gênê, do bêrê erjnayene.

 

Vilakerdişê kartan do Aşma Teşrîna verêne de dest pê biko

 

Badê ke vermuracaatî yew bi yew ameyî erjnayene, encamî do înternetî ser o û bi SMS'î bêrê xeberdayene. JINKART, Aşma Teşrîna verêne ra do cinîyanê ke şertê muracaatî anê ca, înan rê bêro dayene.

 

Xebata JINKART, verê cû do cinîyanê 18-64 serreyî yê ke ameyeyê înan çin o bigîro xo mîyan. JINKART rê do aşme de 90 heqê weniştişî bêrê barkerdene û tesîsanê sosyalî yê Şaredarîya Şaristanê Girdî de zî heqê %20 erjanîye do bêro dayene