STENBOL - ÎSÎGî raporê xo de dîyar kerd ke aşma tebaxe de 179 karkerî, cînayetê karî de dinyaya xo bedelnayî. 

 

Meclisê Weşîye û Asayîşê Karkeran (ÎSÎG) raporê xo yê cînayetê karî yê aşma tebaxe eşkera kerd. ÎSÎGî da zanayîş ke aşma tebaxe de 179 karkerî, cînayetê karî de dinyaya xo bedelnayî. Ame dîyarkerdiş karkerê ke dinyaya xo bedelnayî, 9 ci ra tut ê. Bi dewamî ÎSÎGî vat ke tewr zêde merg, bi 47 kesan sektorê înşaat/rayîrî de pê ameyo. Sektorê ramitiş/daristanî de 39 karkeran, 24 karkerê vurnayîşî, 10 karkerê cayê mendişî û 8 karkerê karê madenî de dinyaya xo bedelnayî.

 

Ame dîyarkerdiş ke se ra 23yê karkerê ke dinyaya xo bedelnayî, berzî ra kewtê war. Se ra 20 seba qezayê trafîkî, se ra 18 seba eciqnayîşî û hezazan dinyaya xo bedelnayê. 

 

Eynî wextî de ame vatiş ke tewr zêde Stenbol de karkeran cînayetê karî de dinyaya xo bedelnayê.