EDENE - Tepişteye Tuba Sert dîyar kerd ke Zîndanê Tîpê Syê Manavgatî de îşkenceyê psîkolojîk tepişteye Zîlan Demîr rê ameyo kerdiş û tehdîd ci rê bîyo û vat, hemverê îşkence de sere nêtewênê.

 

Tepişteye Tuba Sert ke cezayê muebedê girankerde ci rê ameyo birnayîş, Zîndanê Tîpa Syê Manavgatê Antalyayî de yena tepiştiş. Tuba 2yê êlule de keyeyê xo dir pêvînayîşê akerde kerd û bi rayîrê keyeyê xo  binpaykerdişê heqan ê qewimyenê neql kerd. 

 

Goreyê xebera MAyî Tuba Sert dîyar kerd ke sergardîyanî her tim tepişteyan ser o tedayê psîkolojîk kenê û heqê înan yê bingehîn yenê astengkerdiş û tepişteyî bi her tewir heqaret û tehdîdê gardiyanan dir rî bi rî manenê. 

 

Tuba dîyar kerd ke Zîlan Demîr 28ê tebaxe de keyeyê xo dir pêvînayîşê hewtane yê bi telefonî pê ana û Zîlane ra vanê, “lez bike, vazde” û Zîlane zî nê ser de, “Çira ez vaz bidî?” Kena û badê cû zor û şîdet Zîlane rê kenê û erzenê qawîşe. 

 

Tuba wina qal kena: “Badê na hedîse, sergardîyane, gardîyanê camêrdan gêna û erzenê qawîşa Zîlane ser o. Destê înan de jop û kelemçe bîyê. Pêro cam û mazgalê ke korîdor de yê padanê û kewenê qawîş. Gardîyan qawîşe de heqaret Zîlane rê kenê û tehdîd kenê. Ma tepişteyan ra zî waşt ke ma hemverê midûr vejîyê la destûr nêdayî. Ma seba caardişê sergardiyane û midûrî binpaykerdişê heqan dir rî bi rî manenê. Ma do hemverê her tewir zext, îşkence û binpaykerdişê heqan têkoşîn bikerê û sereyê xo nêtewênê. Netîceyê nê çi beno wa bibo ma sere nêtewênenê.” 

 

Keyeyê Tuba Sert zî da zanayîş ke Zîndanê Manavgatî de caardişê hemverê aqilan yenê kerdiş û ê cuya tepişteyan ra endîşeyîn ê.