Zelal Tunç

 

WAN – M.P.  şîdeta sîstematîk ke bi serran o ci rê ameyîne kerdiş, xeylêk rey tehlukeyê kiştişî reyde rî bi rî mende. Roniştişê dewaya M.P. ya ke şîdet ci rê ameyo kerdiş do 27ê Êlule de bêro vînayîş. M.P. seba taqîbkerdişê roniştişî venga pêro cinîyan kerd ke paştdayîş bidê.

 

Tirkîya û Kurdistan de her roje qirkerdiş û şîdetê cinîyan ser o zêde beno. Yew nê cinîyan ra zî cinîya  bi nameyê M.P. ya. M.P. hetê camêrdê bi nameyê H.P.yo ke 22 serrî yo ê reyde zewicnaye ya bi şîdetî reyde rî bi rî menda û seba ke nêro kiştiş dewaya veradayîşî akerda.  

 

Şirawitî cayê ke şîdet ameyîne kerdiş

 

M. da zanayîş ke şîdetê fizîkî yê camêrdo ke ci reyde zewicnayebî, wextê 4 aşmî yê digane de dewam kerd û vat, “Netîceyê pêrodayîşê ey de çeneyê mi şikîya. Ez şîya keyeyê xo. Keyeyê mi vat, 'êdî ma to nêşirawenê.’ Û pîlê keyeyî kewtî werte, dima ra mi şirawitî adreso ke şîdet mi rê ameyîne kerdiş.”

 

Tutanê ci rê zî şîdet ameyo kerdiş

 

M. ard ziwan ke wexto ke tarîxê cîya de şîne bajarê cîya, mêrdeyê aye verê tutanê aye de wesayît de şîdet aye rê kerdo û vat: “Ez tutanê xo reyde bi nobedarî rakewtêne. Mi keye de kilît kerdêne û bi rojan veşan verdayîne." M. ard ziwan ke şîdet tenê aye rê nê, tutanê aye rê zî ameyo kerdiş.”

 

Seba beşdarbîyayîşê roniştişî vengdayîş 

 

Tewr peyîn M. seba  27ê êlule  roja roniştişî ya venga pêro sazgeh û aktîvîstê cinîyan kerd û vat: “Ganî cinî bi hêz bê, bi serran o ez tersaya. Mi nêvat. Ganî tu cinî nêterso, têkoşîn bikero. Xeylêk çî est ê ke ez nêeşkena îfade bikerî. La çi beno wa bibo, mi bi vengêk berz qisey kerd. Mi vengê xo berz kerd. Eke merg bo zî ma do rojêke bimirê la qet nêbo wa bi erj bo.”