Elfazî Toral

 

STENBOL - Avûkatanê Buroyê Huqûqî yê Asrinî ra Razîye Ozturk da zanayîş ke her rewşa Îmraliyî lezkî ya û vat: “Ganî sazgeh û dezgeyî berpirsîyarîya xo ca bîyarê. Ganî na rewşa tecrîdî peynî bibo û CPT lezkî şêro serdayîş.”

 

Rayberê PKKyî Abdullah Ocalan ke Îmraliyî de binê tecrîdê giran de yo, 42 aşmî yo zanayîş nîno girewtiş. Buroyê Huqûqî yê Asrin tebaxa 2024ine de seba Abdullah Ocalanî newe ra muracatê CPTyî kerdî. Muracat de derheqê Abdullah Ocalanî û hîrê tepişteyanê bînan Omer Hayrî Konar, Hamîlî Yildirim û Veysî Aktaş de agahî girewtî û ame vatiş ke derheqê înan de tu averşîyayîş çin o.

 

Avûkatanê buroyê Huqûqî yê Asrine ra Razîye Ozturk derheqê babete de qisey kerd.

 

‘Peynîya tecrîdî do bîyarê’

 

Raziye Ozturke wina qal kerd: “Rewşa Îmraliyî lezkî ya. Ganî sazgeh û dezgehî berpirsîyarîyê xo ca bîyarê. Ganî peynîya tecrîdî bîyarê. Ma bi rêk û pêk raporan danê CPTyî. Ma raporê xo de waştişê pêvînayîşî kerd. CPT dem bi dem yeno welat. Nê serdayîşê periyodîk ê. Pêwa nê şertî, serdayîşî eşkenê bêrê kerdiş.”

 

Şertê îşkenceyî

 

Razîye dîyar kerd ke ganî peynîya nê tecrîdî bêro û wina dewam kerd: “Şertê bîyaye şertê îşkenceyî yê.  Nê tespîtê CPTyî de zî est ê. Ganî peynîya nê bêro û keye û avûkatî pêvînayîşan bikerê. Ma waştişê xo neql kerd. Ma waşt CPT nê ca bîyaro. Bendewarîya ma CPTyî rê oyo ke lezkî serdayîş pê bêrê.”

 

Nêzelalî, nêgirewtişê agahîyan!

 

Razîye qalê raporê CPTyî kerd û vat: “Îfade kenê ke seba dewletê terefgirî destûr nêdanê nêeşkenê eşkera bikerê. Goreyê prosedurê normal dewletê terefgirî tesdîq nêkerê, rapor nêeşkeno bêro weşanayîş. La îstîsna est ê. Nika rewşêke cidî est a. Agahî nîna girewtiş. Rewşêke lezkî est a. Tecrîdêk giran est o. Bi taybetî zî bi nê şarê kurdî yeno tecrîdkerdiş. Ganî seba wedaritişê tecrîdî têkoşînêk zafhetî bêro kerdiş û tecrîdê Îmraliyî bêro wedaritiş. Waştişê ma azadîya fîzîkî ya Abdullah Ocalanî ya. Waştişêk goreyê peymanî yo. Seba nê ganî ma têkoşînê xo dewam bikerê.”