AMED - Platformê Ked û Demokrasî yê Amedî seba mitîngê ke do 1ê Êlule Roja Aştîye ya Dinya bêro organîzekerdiş, vengdayîşê tewrbîyayîşê mîtîngî kerd û ard ziwan ke welatî de lazimîya tewr pîl aştî ya. 

 

Platformê Ked û Demokrasî yê Amedî derheqê rayîrşîyayîş û mitîngê ke bi wesîleya 1ê Êlule Roja Aştîye ya Dinya do bajar de bêro organîzekerdiş, Sendîkayê Kedkarê Zanîst û Perwerdeyî (Egîtîm Sen) yê Hûmara 1ine ê Amedî kombîyayîşê çapemenîye organîze kerd. Kombîyayîş de verfekê Platformê Ked û Demokrasî yê Amedî yê Demî Ûfûk Bûlût dîyar kerd ke serê Şerê Dinya yê Diyîn ra 85 serrî derbaz bî, la hêzê emperyalîst rayîr verê şer, pêrodayîşê newe akerd û vat: “Komelê mîyanneteweyî hemverê kiştişê kedkarê weşîye û rojnamegeran ke şer de zî ganî nêbê hedefî bêveng ê.”

 

Ma fek vera nêdanê

 

Ûfûkî dewam de wina vat: “Ma sey Platformê Kede û Demokrasî hemverê pêro hêriş, şer, nêheqî, ferzkerdişê tarzê cuye yê yew tîp bi israr û rêxistinkerde bi têkoşînêk biqerar, ma do pawitişê aştî dewam bikerê. Heta ke dinyayêk û welatêk ke edalet, têduştî, biratî, laîktî, parekerdiş, hemkarî, pêgirewtiş û cuyêka însanî mende bibo, ma do sanîyeyêk fek têkoşînê aştîye ra vera nêdê. Na çarçewa de ma venga herkesî kenê ke tewrê çalakîyê ke do 1ê êlule de bêrê organîzekerdiş bibê.”

 

Eşkerayîye bi sloganê “Bijî aşitî” peynî bî.