Mîdye Miqted

 

HELEB - Cinîyê Helebî dîyar kerdî ke do bi sloganê "Jin jiyan azadî" û yewîya cinîyan peynîya sîyasetê qirkerdişê cinî bêro û wina vatî: "Ma do bi têkoşînê Jîna, Pexşan û Şerîfe bibê vengê pêro cinîyan."

 

Teda û zordestîyê Îranî yê hemverê aktivîst, nuştox, roşnvîr, siyasetmedarê kurdî dewam kenê. Rejîmê Îranî bi taybetî cinîyê ke çin hesibneno û îşkenceyêk pîl cinîyan rê keno. 16ê êlule de cinîya ciwan a kurde Jîna Emînî ya 22 serrî bi sebebê porê xo baş nêpişta hetê polîsê Exlaqî yê Tehranî ra ameye qetilkerdiş. Dimayê qetilkerdişê Jîna Emînî Îran de protestoyê hemverê rejîmê Îranî dest pêkerd. Bi taybetî dimayê nê serewedaritişî hêriş û tedayê Îranî hîn xidar bîyî. Cezayê îdamî tim kurdan rê yenê birnayîş. Tewr peyîn cezayê îdamî rojnamegera kurde û çalakîkera heqê cinîyan Pexşan Ezîzî û Şerîfe Mihemedî ame birnayîş. 

 

Îdarekarîya Keyeyê Cinî yê bajarê Helebî Sultan Mihemed derheqê babete de ercnayîş kerd. 

 

'Cinî hewnê mergî ra aya bî'

 

Îdarekarîya Keyeyê Cinî yê bajarê Helebî Sultan Mihemed qalê rayîrê xelasîya cinî kerd û vat: "Mîyanê dinya de bi pêroyî yê ke tewr zêde îşkence vînenê cinî yê. Bi taybetî cinîyê kurdî bi çinkerdiş û qirkerdişê hetê sîstemê îqtîdarî ra rî bi rî manenê. La hetêk bîn ra bi fikir û felsefeya fehmê Rayber Abdullah Ocalanî hewnê mergî ra aya bî. Cinîyan hemverê koletî û îqtîdarî sere wedarnayî û bi vatişê Rayber ke vano, 'Eke cinî azad nêbo, komel azad nêbeno' serewedaritişê cinîyan hemverê koletî dest pêkerd."

 

'Sloganê Jin jiyan azadî bî qalxan'

 

Sultane qalê sîstemê Îranî kerd û vat: "Ewro rêjîmê Îranî bi pêro metodê cinîyan keno binê tehluke, kiştiş û qirkerdişî. Wazeno bi nameyê îslamî cinî bêveng verdo û bêsûc cezayan înan rê bibirno, labelê Îran de camêrdê ke sûcan kenê zî nînê cezakerdiş çira? Cinîya bi nameyê Jîna Emînî bi tometê gilayê porê aye asîya, hetê polîsê exlaqî ra ameye kiştiş. Ewro zî derheqê rojnamegera kurde û çalakîkera heqê cinîyan Pexşan Ezîzî û Şerîfe Mihemedî qerarê cezaya dardekerdişî yeno dayîş. La ewro seranserê Başûrê Kurdistanî de heta bi Hindistan sloganê 'Jin Jiyan Azadî' cinî sereyê xo wedernena û li hemverê pêro tewir kiştiş, ceza û qirkerdişî bena qalxan."

 

'Ma pêro Jîna, Pexşan û Şerîfe yê'

 

Sultane dewam de wina vat: "Pexşan û Şerîfe bi çi sûcî û sebebî cezaya dardekerdişî înan rê yena birnayîş? Heqê înan est o ke xebata xo rayîrê çepemenîya azad de dewam bikerê û rastîya dişminî vejê werte. Semedo ke no karê neqlkerdişî yo. Ewro dişmin hewl dano bi nê sîyasetan cinî reyke bîn agêrno tarîxê koletî la wa baş bizano cinî ewro yê verê nîyê. Cinî bi destêk kamera û bi destêk qeleme gênê. Wina pey rastî û heqîqetî gêrenê. No zî verdeno ruhê xoverdayîşî cinî reyde bêro awankerdiş la no zî weşîya dişminî nîno. La wa bizanê ke ma pêro Jîna, Pexşan û Şerîfe yê."