AMED - DEDAŞî pêwa leşkeran eşt dewêke qezaya Bismilî ser o. Leşkerêk payeberzî yê Fermandîyarîya Cendirmeya ê Bismilî û wina tehdîd kerd: “Eke şima destûr nêdê ma do ceyran bibirnê û şima tarî de verdê. Ma do siba zêdeyêr leşkaran reyde bêrê.”

 

Tîmê Vilakerdişê Ceyranî yê Dîcle A.Ş.î pêwa xeylêk leşkeran ewro serê sibayî eştî dewa Heciya Kurdaya qezaya Bismilê Amedî ser o. Wexto ke welatijê taxe nêwaştî tîmê ceyranî saetê ceyranî biancê dîrekan ser o, gengeşe vejîya. Ame dîyarkerdiş ke fermandarêk payeberzî yê Fermandarîya Cendirmeyan ê Bismilî de wezîfedar o, welatijê taxe tehdîd kerd. 

 

Welatijê dewe semedê asayîşî nêwaştî nameyê xo bidê wina vatî: “DEDAŞ ewro pêwa xeylêk wesayîtê leşkerî yê bizirx kewt dewe ma. Vatî ke do saetê ceyranî biancê dîrekan ser. Cinîyêke cewabê nê çî da û înan aye qij fist. Dewijêk zî vera nê reaksîyon da. Ma waşt selahîyetdarêk DEDAŞî reyde pêvînayîş bikerê labelê tu selahîyetdar çinbî. Serê nameyê DEDAŞî de fermandarêk Fermandarîyê Cendirmeyan ê Bislmilî de wezîfedar bî, ma reyde kewt têkilî. Ma vat ke xeylêk dewî vernîya dewa ma de est ê, vernîya dewa ma bêro kerdiş, eynî caardiş ê dewan rê zî bêro kerdiş. Ma dîyar kerd ke na dewe de bi destpêkerdişî bi qestî yeno kerdiş. Ma înan ra, ‘Şima bi zanebîyayîş na dewe de dest pêkenê’ vat û reaksîyon mojnayî.”  

 

'Ma do ceyran bibirnê'

 

Hemverê reaksîyonê şarî ame îdiakerdiş ke leşkerî serê nameyê DEDAŞî de qisey kerdo û vato: “Heta ke ma saetê ceyranî yê dewa şima nêvejê teber, do tu cayêk bîn ra dest pênêkerê. Eke şima destûr nêdê, ma do ceyran bibirnê. Ma do şima tarî de biverdê. Ma do siba zêdeyêr leşkeran reyde bêrê. Ma do saetê ceyranê şima vejê dîrekan ser.”