Melek Avci

 

ANQARA - Profesore Anuradha Chenoy ke unîversîteya Jawaharlal Nehru ya Hîndîstanî de wezîfedar a wina vat: “Cinî nêwazenê bikewê binê tedayan. Cinî êdî destur nêdanê tedayan. Heta azadîya cinîyan çinî bo tu kes azad nêbeno.”

 

Bajarê Kalkuta yê girêdayeyê eyaletê Bengala Rojawanî yê Hindistanî 9ê tebaxe de nêweşxane de desteştişê doktorêke cinî ya stajyere amebî kerdiş û  dima ra amebî qetilkerdiş. Dimayê ke hedîse ameye eşnawitiş, xeylêk cayê Hîndîstanî de doktorî vejîyayî kuçeyan û hêrsê xo ardî ziwan. 18ê tebaxe de Yewîya Tabîbê Hîndîsanî, vatî do xizmetê nêferzî bêrê vindarnayîş û seba şikdarî bêrê cezakerdiş 72 saete dem amebi dayîş. Endama hîndekarîya unîversîteya Jawaharlal Nehru a Hîndîstanî, Profesore Anuradha Chenoy, derheqê hedîse de ercnayîş kerd.

 

‘Camêrdê ke merciyê berzî xo hedîseyan ra xilas kenê’

 

Anuradha wina vat: “Sey xeylêk cayê dinya, Hîndîstan de zî cinî her tewir şîdetî reyde yenê rî bi rî. Keye ra bigîrê, heta wareyê îstîmlakî. Hîndîstan de cinî pêro wareyê îstîmlakî de xebityenê. Hîndîstan de babeta ke cinîyan desteştişî û pêro şîdetî bipawo, qanûnan vejo zî sîstemê serdest yê camêrdî sûcê hemverê cinîyan dewam kenê û bêceza zî manenê.”

 

Qanûn est o caardiş çin o!

 

Anudradha wina dewam kerd: “Caardişan de çi heyf ma eynî hêzî nêvînenê. Hîndîstan de xeylêk rêxistinê cinîyan yê xurt est ê. Xeylêk sazgehê komelê sivîlî yê têduştîya cinsî esas gênê est ê. La vernîya cinîyan de sûc yenê kerdiş. Xeylêk qanûnî est ê la çi heyf caardişan de qels maneno. Ganî sûcê wina de cezayê giranî bêrê dayîş, Ganî kampanyayê hişmendî bêrê kerdiş. La çi heyf Hîndistan de hukm zaf êdî aver şino.”

 

‘Cinî êdî destur nêdanê tedayan’

 

Anuradha tewr peyîn wina vat: “Cinî dîyar kenê ke ê wayîrê heqê azadîya ke têgêrayîşî, bedenê xo kontrol bikerê û wayîrê heqê weçînayîşî yê. Cinî nêwazenê bikewê binê tedayan. Cinî êdî destur nêdanê nê tedayan. Semedo ke têkoşînê cinîyan global o. Hewce bi kolektîfbîyayîşî est o. Heta azadîya cinîyan çinî bo tu kes azad nîyo.”