Rabîa Onver

 

COLEMÊRG - Pêro prosesê viraştişê penîrî bi vaş, bi keda cinîyan temam beno. Cinî viraştişê penîr de bi saetan kede danê. Dewa Xirwatî de yew cinîya ke bi viraştişê penîrî debara xo kena Şukran Çetînkaya ya. Şukrane wina vat: “Şitê xo ma kenê penîr, rûn, torak, mast û sewbînî çî. Çimeyê debara ma dewe û pesdewerî yo.”

 

Cinîyê ke seransrê wisarî de zozananê berzî de seba viraştişê penîr pincar arêdayî, nika zî pêro  wextê xo bi viraştişê penîrî derbaz kenê. Bi giranbîyayîşê krîzê ekonomî, penîrê bi vaş zî nesîbê xo vayî ra girewt. Qezaya Geverî ya Colemêrgî de dewa Xirwatî de, cinîya bi nameyê Şukran Çetînkaya derheqê babete de qisey kerd û viraştişê penîrî qal kerd.

 

‘Bi bêrîvanî debara xo kena’

 

Şukrane vat, 13 serrî yo bi bêrîvanî debara xo kena û wina dewam kerd: “Ma siba saete 06.00ine de wurzenê. Mangayêke mi est a. Ez şina doşena. Dima ra yena keye. Werd viraznena. Saete 11.00ine de şina zozanan. Ma nîmeyê roja xo bi antişê pesî derbaz kenê. 80 heb pesê mi est ê. Ma bi şitê pesî penîr, mast, torak û rûn viraznenê.”

 

‘Seba debare ma roşenê’

 

Şukrane wina dewam kerd: “Şitê xo ma kenê penîr, mast û sewbîna çî. Çimeyê ma dewe û pesdewarî yo. Verê ma şit bi 30 TL dayîne, nika ma bi 35 TL danê. Kîloyê penîrî 200 tL yo. Serra vîyarte ma bi 150-170 rot. Ma seba xo zî viraznenê. Seba wesayîtî ma aşme 4 hezar û 200 TL danê û pere wina şino. Ma bi kedêke pîl penîr viraznenê. La beramberê keda ma çin a. Ma serê sibayî şinê şit roşenê. Bi saetan ma ancenê. Ma dima ra benê keye, kenê beroş û maya kenê. Dimayê saetêke ma vaş kenê têmîyan û danê vindarnayîş. Ma di rojî danê vindarnayîş. Dima ra ma kenê bîdonan û kenê binê herre. Zimistanî yenê şuxilnayîş.”

 

‘Ma dewe de cuyêka xozayî dewam kenê’

 

Şukrane vat, cuya dewe goreyê bajaran hîn başêr a û vat: “Dewe de baxçeyê ma, heywanê ma est ê. Ma xidayanê xo bixo berarde kenê. Penîr, mast, hak, sebze û fêkî est ê. Her çî xozayî yo. Ma cuya bajêr ra weşikêr, cuya xo dewam kenê.”