MERKEZÊ XEBERAN - Rêxistina Rojnamegeranê Sînornênasan neql kerd ke ganî selahîyetdarê tirkî derheqê qetilkerdişê rojnamegeran de hesab bidê.

 

Vizêr dewleta tirkan sînorê Seyîdsadiqî yê ke bi bajarê Silêmanî ser o, bi teyareyêk bêmerdim û bi çeke, wesayîtê rojnamegeran bombavaran kerd. Netîceyê hêrişê hovane de 2 rojnamegerê cinî yê bi nameyê Gulistan Tara û Hêro Bahadîn ameyî qetilkerdiş û 6 rojnamegerî bînî zî birîndar bîyî. Rêxistina Rojnamegerê Sînornenas (RSF) derheqê babete de eşkerayîyêke dayî.

 

Eşkerayîye de wina ame vatiş: “Rojêke dimayê îqazkerdişê RSFyî yê derheqê zêdebîyayîşê şîdetê beramberê rojnamegerê ke Herêma Kurdistanî de, 2 rojnamegerê cinî ameyî qetilkerdiş. 23yê Tebaxe de netîceyê hêrişê bi dronan ame caardiş de Gulistan Tara û Hêro Behadîn dinyaya xo bedelnayî û Rêbîn Bekir zî birîndar bî. Her hîrê rojnamegerî zî qenalê Stêrk TV ke girêdayeyê Kampanyaya Çetir xebatê xo kerdêne.

 

Goreyê şahidan, qezaya Seyîdsadiqî ke Silêmanîye ser o ya, wesayîtêk hetê dronek ra hedef ame girewtiş. Wezaretê Pawitişî yê Tirkîya yê Anqarayî Agence France-Presse’î (AFP) rê neql kerdo ke hêriş hetê artêşa tirkan ra nêameyo kerdiş.”