Rozerîn Gultekîn

 

STENBOL - Dimayê dadgerî dosya usulî xira kerd hunermende Dîlan Cudî Saruhan hetê dadgeha herêmî ra ameye veradayîş. Dîlane wina vat: “Mi xeylêk bêrîya ko û herre kerda. Ganî zêdeyêr wayîrvejîyayîşê zîndanan bibo. Tenê dayîkî nê, ganî şar, ciwan û dostê kurdan zêdeyêr berpirsyarî bigîrê xo ser.”

 

Dîlan Cudî Saruhan 2017ine de wextê wendekara Beşê Fakulteya Hunerê Weşikî ya Unîversîteya Marmarayî bî, ameye tepiştiş. Mesajê ke Dîlane hevala xo rê şirawitibî sey "Hemverê herikbarîyê cuye ya" ame vînayîş û bi sûcdarîya "endamîya rêxistine" 9 serrî ceza ci rê ameye birnayîş. Sûcdariya "xirakerdişê yewîya desturê bingehîn" qerarê beratî ame dayîş û 2017ine de ameye tepiştiş. Dîlane 7 serrî tepişte mende û dosya aye şirawitî Dadgerî. Dadgerî dosya xira kerd û newe ra şirawit dadgeha herêmî. Roniştişê yewin ê dadgehe de Dîlane sûcê "endamîya rêxistine" ameye tahlîyekerdiş. Cezaya Dîlane na rey vistî 7 serrî û 6 aşmî. Dosya nika ancî dadgerî de ya. Dîlana ke tahliye bî, derheqê prosesê zîndanî de ajansê ma rê qisey kerd.

 

‘Mi zîndan de xo ancî newe kerd’

 

Dîlane wina vat: “Proseso ke ez ciwîyaya xeylê çî bi mi da qezenckerdiş. Mi 7 serrî de bêrîya koyan û herre kerd. Mi bêrîya dare kerd. Ez zîndan ra vejîyaya roja diyîn şîya mi dare ko kerd. Zîndan de mi xo newe kerd. Mi xeylêk cinîyê xoverdayoxî nas kerdî. Cinîyê xurtî nas kerd. Tesîrêk pîl mi ser de kerd. Heta zindan veng nêbo azadî çin a. Ganî zîndanî nêrê xovîrrakerdiş. 7 serrî tepişte mende mi rê zehmet bî la her tim bi têkoşîn derbaz bî. Zîndanan de xoverdayîşêk pîl est o.”

 

‘Mi vat ez hûnera xo kena û şima nêeşkenê vernîya mi padê’

 

Dîlane wina vat: “Mi resim ra hes kerdêne la nêverdayîne ez resimanê xo arêdî. Her rey desteser kerdêne û nêdayîne mi. Vatêne teberê amancê ci şuxilnayîş qedexe yo. Mi zî wuşt tîşort û atletanê xo ser resim xêz kerd. Mi vat, wa bala înan nêanco. Mi şertê bîyaye de bi hîsê xo hunûnerê xo dewam kerd.  Mi nexşê ke kerdibî bi rehetî vet teber. Mi vat şima wina bikerê ez o hûnerê xo bikerî. Mi vat şima nêeşkenê vernîya mi padê. Çanakkale û Stenbol de nêweşê mi bi pêşangehêk ameyî pêşkêşkerdiş.”

 

‘Berpirsîyarî keweno ser milê pêro kesî’

 

Dîlane tewr peyîn wina vat: “Çalakî û bernameyê teberî hemverê tecrîdî pê yenê, tesîrêk pîl tepişteyan ser o keno. La ganî komel tewr zêde berpirsyarî bigîro xo ser. Ma vînenê ke wayîrvejîyayîşê zîndanan kêmî yo. Ganî binpaykerdişê heqan, bêhuqûqî yê zîndanan nêrê qebûlkerdiş. Tililiyê dayîkan yê ke verê zîndanî, mektubê teber ra ameyîne moralêk pîl dayîne ma. Coka berpirsyarîyêk pîl keweno serê milê sazgeh û şarê ma.”