Gulîstan Gulmuş

 

ŞINREX - Meclîsê Cinîyan ê DBP û TJAyî hemverê polîtîkayê şerê taybetî atoleyeyan organîze kenê. Endama Meclîsê cinîyan ê DBPyî Guvercîn Aras derheqê atolyeyan de qisey kerd û dîyar kerd ke cinî çîyê ke ciwîyenê atolyeyan de pare kenê. Guvercîne dîyar kerd seba çareserî ganî paradîgma azadîya cinî bikewa cuye.

 

Meclîsê Cinîyan ê Partîya Herêmê Demokratîke (DBP) û Têgêrayîşê Cinîyanê Azadan (TJA) hemverê polîtîkayê şerî de çarçewaya têkoşînî de atolye dayî destpêkerdiş. Atolye bajaranê Kurdistanî de dewam kenê. Hemverê caardişê sey desteştişî, fuhuş, tîryakî yê şerê taybetî taxan atolye pê yenê. Yew bajarê ke atolye ci de yena kerdiş, Şirnex o. Endama Meclîsê Cinîyan ê DBPyî Guvercîn Aras derheqê babete de qisey kerd.

 

‘Ma yenê nokteyêke pozîtîf ke netîce gêna’

 

Guvercîne wina vat: “Bi destê dewlete hemverê xoza û cinî, polîtîkayê dişminî yenê kerdiş. Cinîyan û ciwanan ser o polîtîkayê şerê taybetî yenê kerdiş. No sey konseptêk Botan de ameyo bicakerdiş. Cinî, tutî û xoza zaf tesîr benê. Ma tax bi taxe xebityenê. Ma cinîyan reyde yenê têhet û kampanya danê destpêkerdiş. Ma netîceyê muhîm û pozîtîf gênê. Cinî eleqeyêk pîl mojnenê. Ganî ma xebata xo dewam bikerê û polîtîkayê şerî parçe bikerê.”

 

‘Cinî çîyê ke ciwîyenê qal kenê’

 

Guvercîne dewam de wina vat: “Pêvînayîşê yenê kerdiş de cinî çîyê ke ciwîyenê pare kenê. Hewteyê vîyarte de di cinî amebî taxe. Vatî, ‘werrekna şima verê ma ra nê çî bivatêne’. Her di cinî çawîşê pisporî reyde zewicyayê. Yew serrêke zewicnaye menda, a bîne zî 6 aşman. Dima ra ca verdayê. Na polîtîkayêke şerê taybetî ya.”

 

‘Ma na kampanya dewam bikerê’

 

Guvercîne tewr peyîn wina vat: “Hedefê ma oyo ke ma bi hişmendîyê azadîya cinî destê xo bidê pêro cinîyan. Ma pîya manayîn ê. Ganî ma paradîmga azadîya cinî bikerê cuye. Ganî têkoşînê cinî her ca de bo. Ma do kampanyaya xo heta peynî dewam bikerê. Ma do dest bidê pêro cinîyan. Ma do xebatan pêro taxan de cinîyan reyde bikerê.”