WAN - Cinîyê dewa Xokanî ya Elbakê Wanî serê sibayî verê xo danê zozanan û tîya pesê xo doşenê. Seba debara xo bikerê zî şit û penîrê xo roşenê. La cinîyan dîyar kerd ke şît û penîr pir erjan şino û keda înan pêro veng şina.

 

Cinîyê dewa Xokanî ya qezaya Elbakê Wanî de ciwîyenê, serê sibê rew wurzenê dimayê ke karê xo yê keyeyî qedênenê, saete 08.30ine de wesayîtanê xo espar benê û verê xo danê zozanan. Serranê vîyarte de bi estoran şîne, la serranê peyînan de zî  bi wesayîtan verê xo danê zozanan. Zehmetîyê ke hema serê sibayî keye de destpê kenê rayîr de zî dewam kenê û heta xo resnenê zozanan. Dimayê raywanîyêk bi qasê nîm saetî resenê zozanan. Pes û bizinanê xo doşenê.

 

Bi şit û penîr debara xo kenê û cinîyan dîyar kerd ke  seba ke beranberê karê ke kenê nêeşkenê debara xo bikerê û gerreyê xo ajansê ma JINNEWSî rê ardî ziwan.  

 

Dewe de erjan o Wan de vay o 

 

Ayten Ozdemîr, wina qal kerd: "Wexrê wisarî pesê xo nezdîyê xo gênê û doşenê la wexto ke hewa germ bena, verê xo danê zozanan. Nêzdîyê di aşman ma zozanan de manenê. Wexto ke beno payîz zî ma ancî yenê nêzdîyê dewe. Ma serê sibayî heta şan de verê tîjî de manenê. Ma şito ke uca de doşenê benê dewe. La ma xeylê erjan roşenê. Kesê ke ma ra gênê benê Wan û hîna vay roşenê. Ma beranberê keda xo nêeşkenê debara xo bikerê. Xeylêk kekeyî bi rotişê şitî debara xo kenê labelê nika xeylêk zehmet o."

 

Nêeşkenê pê debara xo bikerê

 

Hacer Kardaş zî wina vat: "Tewr erey ma saete 09.00ine de keye ra vejîyenê û verê xo danê zozanan. Heta saete 13.00ine zozan de manenê. Dimayê ke pesê xo doşenê, verê xo danê dewe. Ma şitê ke doşenê makîneyê şitî ra derbaz kenê û dima ra kenê penîr. Ameyîş û şîyayîşê ma yê zozanan xeylêk zehmet o. Dima ra ma yenê keye dest bi pewtişê nanî kenê. Ma semedê kesê ke pale kenê zî werd amade kenê. Ma şitê ke doşenê kenê penîr û danê çerçîyan. Bi rastî wexto ke ma şit û penîr roşenê zî ma pereyêk zêde qezenç nêkenê û ma nêeşkenê pê debara xo bikerê zî." 

 

Raywanîyêke zaf zehmet a

 

Behiye Kardaş zî wina qal kerd: "Ez serê sibayî rew aya bena û mîr kena û dima ra şina mangan doşena. Dima ra zî nanê xo pewijnena û verê xo dana  zozanan. Raywanîya ver bi zozanan xeylêk zehmet a semedo ke rayîr qet baş nîyo. Seba ma hem kar zêde yo û hem zî zehmet o. Ma heta ereyê roje binê tîjî de pes doşenê. Ma ê zehmetîyan pêro ancenê labelê ma şit û penîrî xo pir erjan danê çerçîyan. Ma nêeşkenê debara xo bikerê û heqê xo bigîrê."