AMED - Meclîsê Şaredarîya Amedî ya Şaristanê Girdî, seba ke erdê zîraetî ke şewatê Qezaya Çinarî de zarar dîyê, bêrê weşkerdene, bi yewvengî qebul kerd ke 50 tonî destegê genimî citkaran rê bêro dayene.

 

Meclîsê Şaredarîya Şaristanê Girdî, roniştişê hîrêyinî yê kombîyayîşê normalî yê aşma tebaxe de, seba erdê ziraetî ke 20ê Hezîrane de şewatê ke mabênê Qezaya Çinarî ya Amedî û Qezaya Şemrexî ya Mêrdînî de vejîya û 15 kesî cuya xo vînî kerdî, ci ra zerar dîyê, seba înan qerarêk guret.

 

Kombîyayîşê aşma temmuze de, na babete ameybî pêşnîyazkerdene û Meclîsî de ame qebulkerdene, babete erşawîya Komîsyonê Ekonomîya Herêmkî. Raporo ke Komîsyonî amade kerd, ame pêşkêşkerdişê Meclîsî û ser o ame vindertene. Meclîsê Şaredarîya Şaristanê Girdî, raporo ke tede destegê 50 tonî genimî est o ke do seba weşkerdişê erdanê zîraetî ke şewatê Qezaya Çinarî de zarar dîyê, citkaran rê bêro dayene, bi yewvengî qebul kerd.

 

‘Ma do şarî reyde bê’

 

Hemverfeka Meclîsê ŞŞA’yî Emîne Akin dîyar kerd ke şewato ke 20ê Hezîrane de mabênê qezayanê Çinar û Şemrexî de vejîya, bî sebebê can û malî û va ke ê do citkaran rê ke şewatî de zarar dîyê, destegê 50 tonî genimî bidê. Emîne dîyar kerd ke qerar Meclîsî ra vîyart û va ke ê do dewam bikerê ke hetê şarî de vindê.

 

'Do desteg aşma teşrîna peyêne de bo’

 

Serekê Daîreya Xizmetanê Teberî Velat Ozerî zî ard vîrardene ke şewat cayêkê hîrayî de vejîya û erdê ramiteyî zî zerar dîyê û wina va: "Ma goreyê nê tespîtan, seba ke erdê ramiteyî yê Taxayanê Koksalan, Yazçîçegî û Agaçsever ê Qezaya Çinarî zarar dîyo, muxtaran reyde yew xebata fîzîbîlîteyî kerde. Ma do mîyanê aşma teşrîna verêne de şarê xo û citkaranê xo rê destegê toximê genimî bidê.”