Rabîa Onver 

 

COLEMÊRG - Welatijê ke dewa Xirwateyî ya Geverî de ciwîyenê, dîyar kerdî ke seba krîzê ekonomî nêeşkenê debara xo bikerê. Bêrîvanê ke herême de yê, dîyar kerdî ke seba vayîye çîyêk destê înan de nêmendo.

 

Seba tesîrê krîzê ekonomî rewşa şarî her ke şina xirabêr bena, cinîyê ke dewan de ciwîyenê pereyê ke berardişî roşenê, debara xo kenê. Cinîyê dewa Xirwatî ya qezaya Geverî ya Colemêrgî de ciwîyenê, debara xo bi weykerdişê heywanan kenê. La êdî seba krîzê ekonomî nêeşkenê lazimîyê xo yê rojane zî pê bîyarê. 

 

Cinîyan ajansê ma rê qisey kerdî û bale antî rewşa xo ya ekonomî ser o. 

 

 

Bi weykerdişê pesî debara xo kenê 

 

Arzu Çîçek, wina qal kerd: “Ma verê ameyîne deşte û ma çadire dayîne ro û nêzdîyê 2 aşman uca de mendêne. Nika wesayîtî est ê û ma yenê û mîyanê roje de zî agêrenê. Semedo ke rayîrê ma xirab ê, ma bi saetan rayîr de mendêne la semedo ke ma mecbûr ê, ma nê çî ancenê. Ma cuya xo bi pesî derbaz kenê. Ma şit kenê penîr û roşenê. Ma saete 11:00 de şinê zozan û heta saete 16:00ine uca de manenê. Ma kîloyê şitî bi 40 TL roşenê. Ma 4 hezar TL danê wesayîtê ke wa ma bîyaro û seba 2 aşman. Pereyê ke ma danê, pereyê ke ma gênê eynî yo."

 

 

'Ma neêşkenê debara xo bikerê'

 

Makbule Eren zî wina vat: "Erê, ma nika bi wesayît yenê, la rayîrê ma zaf tehlukeyîn o. Ma yenê seba ke ma mecbûr ê. Şitê ke ma doşenê, ma pê penîr viraznenê. Ma penêr bi 200 TL, şito teze zî bi 40 TL roşenê. Bi rotişê penîrî ke ma viraznenê, ma eşkenê şîyayeyê xo yê keyeyî bikerê, tay bo zî bidê. Ma şit bi 25-35 TL rotêne. Wexto ke erjê mazotî ame zêdekerdiş, semedo ke ma erebe kîra kerdêne ma bêrê uca, ma mecbûr mendî zêde bikerê. Verê her çî erjan bî, ma eşkayîne debara xo başêr bikerê, la nika her çî vay o û ma bi zor eşkayîne debara xo bikerê." 

 

 

'Her çî vay bîyo'

 

Ayşe Onat, wina vat: "Ez hem seba keyeyê xo, hem zî seba rotişê penîr, mast û rûn virazneno. Şeş keyeyî yenê têhet û her roje şitê xo danê kesêk ke ma xeylêk penîr viraznê û biroşê. Her çî vaye bîyo. Semedo ke her çî vaye yo û ma zî mecbûr benê ke vayîya şit û penîr zêde bikerê. Zaf zehmet o, la eke ma nê karî nêkerê, dewe de çîyêk bîn çin o."