WAN - Penîro vaş bi taybetmendîyê xo bale anceno xo ser. Fehîme Kardaş ke dewa Xokanî ya qezaya Elbakê Wanî de ciwîyena, qalê viraştişê penîr û arêdayîşê vaşê penîrî kerd. 

 

Amadekarîyê penîrê vaşî ke sifreyanê Wanî ser o qet kêm nêbeno û wexto ke vewre helêna, dest pêkeno. Penîrê vaşî ke bi kedêke pîlî hetê cinîyan ra yeno sifreyî ser, vernîya viraştişê ci bi vaşê ke cinî arêdanê dest pêkeno û şinê koyanê berzî. Dewa Xokanî ya qezaya Elbakê Wanî de qonaxê berardişê penîrê vaşî dest pêkerd.

 

Fehîme Kardaş dewa Xokanî de ciwîyena û bi serran o penîr viraznena û ajansê ma rê qalê viraştişê penîrî kerd. 

 

Fehîme, da zanayîş ke wexto ke wisar dest pêkeno seba arêdyîşê pincaran şinê zozanan û vat: "Dimayê arêdayîşê pincaran înan werdî kenê, dimara awa girnaye erzenê ser û zerd kenê. Dima ra şûnê, kenê bidonan û awe zêde kenê. Ma xeylêk tewir vaşê penîrî arêdanê û cîya cîya wedarnenê. Wexto ke  hewa germ bena û ma şinê zozanan û pesê xo ancenê û dest bi viraştişê penîrî kenê." 

 

Fehîme, dewam de wina vat: “Dimayê ke qasê des rojî pesê xo nêzdîyê dewe kenê, labelê xeylê xo ma şinê zozanan. Ma zozanan de pesê xo doşenê û agêrenê dewe. Dima ra ma şitê ke anê, vaşê ke ma arêdayê, kenê ser. Dimayê ke awe ci, ci ra şina ma tira kenê, sole kenê û kenê mîyanê bîdonan." 

 

Ê bi di hawayê cîya penîrê vaşî viraznenê

 

Fehîme vat ê bi 2 tewirî penîr viraznenê û wina vat:  "Penîrê xo seba zimistanî hem mîyanê sûravkî de verdenê, hem zî çal kenê. Wexto ke biwazê penîr zuwa verdê, vernê de sole kenê û satilek de arêdanê û dimayê ke awe ci ra şî kenê bidonan û mîyanê herre de çale kenê. Ma aşma teşrîna verêne de dest bi werdişê penîrî kenê. Hîn kesî penîrê xo rew vejenê û dest bi werdişî kenê, hîn kesî zî dima ra vejenê. Penîrê ma hîrê aşmî binê erdî de manenê. Hîn penîrî heta hamnanî zî manenê. Dimayê ke ma qasê xo penîr viraznenê, ma şit kenê şûşanê plastîk û kenê dolaba qeşayî û aşmanê zimistanî de ma wenê."