Elfazî Toral

 

STENBOL - Meclîsê Cinîyan ê DEM Partî ra Nazmîye Ulker da zanayîş ke lazim o ma serdemêk ke yew cinî zî bêrêxistin nêmano awan bikerê û vat: "Ma bi têkoşînê cinîyan ê rêxistinkerde eşkenê şîdet bidê vindarnayîş."

 

Şîdetê cinîyan ser roj bi roje zêde beno, her roje tewr tay 8 cinî yenê qetilkerdiş. Îqtîdarê AKP-MHPyî ke polîtîkayê şîdet û qetlîamê cinîyan ser o israr keno, hêrişê xo yê bi amancê desteserkerdişê, destkewtişê cinîyan dewam keno. Îqtîdaro ke polîtîkayê şîdetî de israr keno, bi polîtîkayê bêcezaverdayîşî cesaret dano camêrdan. Heto bîn ra hem hemverê qirkerdişî û hem zî hemverê polîtîkayê bêcezakerdişî her raşteyî de têkoşînê xo hîra kenê. Goreyê dayeyê ajansê ma arêdayî, aşma temmuze de 21 cinî ameyî qetilkerdiş û nînan ra 22 cinî mîyanê şert û mercê şikdarî de dinyaya xo bedelnayî.

 

Endama Meclîsê Cinîyan ê Partîya Têduştî û Demokrasî (DEM Partî) Nazmîye Ulker JINNEWSî rê zêdebîyayîşê şîdetê cinîyan ser û xeta têkoşînî yê hemverê şîdetî ercna û vat, “Lazim o ma serdemêk ke yew cinî zî bêrêxistin nêmano awan bikerê.”

 

 

'Qanûnê pawitişê cinîyan yew bi yewe werte ra wedarnenê’

 

Nazmîye wina qal kerd: “Cinîyan her şîdet dî, sîstemê cayê muracatî nêverdayî. Her paketa hukmî de her tim rêziknameyê ke destkewtişê cinîyan peyser ancenê, yenê viraştiş. Destkewtişê cinîyan bi taybetî Peymana Stenbolî hedef yena girewtiş. Qanûnê pawitişê cinîyan yew bi yewe werte ra wedarnenê. Polîtîkayê bêcezakerdişî dewam kenê."

 

 

'Lazim o serdemêk ke ci de cinîyêke bêrêxistin nêmano bêro awankerdiş'

 

Nazmîye dîyar kerd ke yew sebebê tewr pîl ê hêrişan destkewtişê cinîyan û têkoşînê xurt ê cinîyan o û vat, hemverê polîtîkayê şîdet û qetlîamê îqtîdarê AKP-MHPyî yê cinîyan ser, pêgirewtişê cinîyan muhîm o. Nazmîye wina vat: “Îqazkerdişê cinîyan muhîm o û ganî bi nê hişmendî xo bipawê û têkoşîn bikerê. Êdî eşkere yo ke no sîstem nêeşkeno cinîyan rê çîyêk bikero. Têkoşînê cinîyan ê rêxistinkerde coka muhîm o û pêro cinî lazim o ke paştdayîş bidê yewbînan. Tenê eke ma bi no hawayî bikerê ma eşkenê nê şîdetî peynî bikerê. Lazim o serdemêk ke ci de cinîyêke bêrêxistin nêmano bêro awankerdiş."