Reaksîyonê hemverê tayînkerdişê qeyûmî yê Şaredarîya Colemêrgî ya ke binê îdarekarîya Partîya Têduştîye û Demokrasî (DEM Partî) de bî 3yê Hezîrane ra dewam kenê. Hemverê desteserkerdişê qeyûman bi beşdarîyê bi seyan kesî çalakîya "Rayîr şîyayîşê rêzgirewtişê îradeyî" yê 6 rojan ê hetê DEM Partî ra yeno organîzekerdiş, çalakîya nobetî ya hemverê qeyûman dewam kena.

 

Hemşaredara Geverî Şadiye Kirmizigul derheqê qeyûmî ke tayînî şaredarîya Colemêrgî ame kerdiş de ercnayîş kerd.

 

'Eke rayî bêrê peygoşkerdiş ganî weçînayîşî nêrê kerdiş’

 

Şadîye vat sîstemê hemserekî DEM Partî reyde vila bîyo û vat: “Seke şima zanê ma prosesêk weçînayîşî ra derbaz bîyî. Yew bajarê ke weçînayîşî ci de zêde bî zî Colemêrg bî. 3yê Hezîrane de Colemêrg de qeyûm ame tayînkerdiş. Bi serran o ma vanê û ma do vajê ke ma sîstemê qeyûman qebûl nêkenê. Şar îradeyê xo mojneno û hemşaredaranê xo weçîneno. La sîstemê qeyûman îradeyê şarî nêvîneno. Ma nê zîhnîyetî qebûl nêkenê. Eke zîhnîyetê qeyûman dewam bikero, çira weçînayîşî yenê kerdiş? Eke rayê ma bêrê peygoşkerdiş, ganî weçînayîş nêro kerdiş."  

 

'Şar sîstemê hemserekî ra memnûn o'

 

Şadîye dewam de wina vat: “Dimayê ke ma ameyî weçînayîş û dest bi kar kerd, çîyo ke bala mi ant nêbîyayîşê cinîyan ê şaredarî bî. Cinî yenê tîya, qalê problemanê xo kenê û lazimîyê xo anê ziwan. Ma bi zelalî vînenê ke semedo ke ma tîya yê zaf keyfweş ê. Xeylê cinîyê ke ameyî verê ma vatî ke sîstemê hemserekî ra memnûn ê û no çî moral dano înan ke wexto ke ameyî şaredarî tewr tay cinîyêk înan reyde qisey bikero. Her welatijê ma yê ke ame şaredarî vat ke 10 serrî yo nêeşkenê bêrê şaredarî û problemê xo nêeşkayîne bîyarê ziwan. Ma her çîyo ke destê ma ra yeno ma semedê şarê xo kenê ke qeyûm nêkeno û ma do dewam bikerê."

 

'Şaredarî keyeyî şarî yo'

 

Şadiye tewr peyîn wina vat: “Zîhnîyetê qeyûmî welatijan ko nêkeno û problemê înan çareser nêkeno. Dimayê her weçînayîşî qeyûm yeno tayînkerdiş. Şar wareyê xizmetî de mexdûr bîyo. No şar bêveng nêmaneno û qebûl nêkeno. Ma tîya yê, na şaredarî keyeyê şarî ya û berê ma her tim her kesî rê akerde yo. Ma do heta destê ma ra bêro xizmet şarê xo rê bikerê. Ma do her ca de bê. Ma do xizmetê semedê şarî, cinî, ciwan û tutan dewam bikerê."