Elfazi Toral

 

STENBOL - ÎHDyî ra Hatîce Onaran binpaykerdişê heqan ke tepişteyê sîyasî bi taybetî tepişteyê nêweşî yê giranî zîndanan de yeno kerdiş û wina vat: "Ganî tepişteyê nêweşî bêrê veradayîş. Bêşik çîyêk est o yê ke semedê heqê merdiman şer kenê, bi xususî çalakîkerê heqê merdiman, yenê tepiştiş."

 

Her roje binpaykerdişêk newe binpaykerdişê heqê merdiman yê tepişteyê sîyasî yê zîndanê Tirkîya yenê zêdekerdiş. Tepişteyê ke nêeşkenê biresê heqê xo yê tewr bingehîn zî zîndanan de şîdetî reyde rî bi rî manenê. Her ke şino şert û mercê tepişteyan tewr giran beno, dayeyê raporan de ca gênê bale ancenê. "Raporê Binpaykerdişê Heqê Zîndanan Herêma Marmarayî" ya 3 aşman ke 26ê Temmuze de hetê Komîsyonê Zîndanan ê Şubeyê Komeleya Heqê Merdiman (ÎHD) ê Stenbolî ra ame weşanayîş zî dayeyê muhîmî est ê. Goreyê raporê ke serê muracatê komele ra hetê 100 tepişteyan ra 23 zîndanê ke 11 ci ra zîndanê herêma Marmarayî de yê, ameyo amadekerdiş, 3 aşman de (Nîsan-Gulan-Hezîran) 2 hezar û 916 binpaykerdişê heqan ameyê tespîtkerdiş û 7 tepişteyan zîndan de dinyaya xo bedelnayî.

 

Endama Komîsyonê Zîndanan ê Şubeyê ÎHDyî ya Stenbolî Hatîce Onaran derheqê binpaykerdişê heqan ên zîndanê Kurdistanî û Tirkîya bi taybetî tepişteyê nêweşî yê giranî JINNEWSî rê qisey kerd.

 

'Heqê cuye yeno astengkerdiş'

 

Hatîce bi taybetî bale ant serê tepişteyê nêweşî yê ke raporê binpaykerdişê heqan ê hîrê aşman de rewşa înan giranêr bena û vat: "Ma zanê ke tepişteyê astengdarî yan zî nêweşê giranî eşkenê zîndananê Tirkîya de bimanê, kesê ke nêweş nêbê bikewê zîndan zî demêk nêzî de bi gerreyanê cîya, gerreyê giranî û problemê weşîye reyde rî bi rî manenê."

 

3 aşman de 7 tepişteyan dinyaya xo bedelnayî!

 

Hatîce vat: “Sere de binpaykerdişê heqê cuye û resnayîşê weşîye yê yewine yo. Wexto ke ma 3 aşman ra ewnîyenê, ganî ez nê zî dîyar bikerî ke 7 tepişteyan dinyaya xo bedelnayê, bi qasê ke ma musenê hem Wezaretê Edaletî û hem zî Mudurîyê Zîndanan sebeb rayaumûmî reyde pare nêkerdê. Wexto ke ma qalê resnayîşê weşîye kenê, pêro nêweşî uca ra dest pêkenê. Rewşa tepişteyê ke nêweş bo û nêro dermankerdiş, rewşa ey giranêr bena. "

 

'Ganî tepişteyê nêweşî bêrê veradayîş'

 

Hatîce dewam de wina vat: "Ma wazenê tepişteyê nêweşî bi taybetî yê nêweşê giranî bêrê veradayîş. Ganî nêweşê ke giran ê, kokimî, bi taybetî zî bi Serekkomarî bêpêvînayîşî, înan serbest vera bidê. Ma wazenê no sîyaseto dişminî bi taybetî semedê tepişteyanê sîyasî bêro vurnayîş û nêweşê ke nêeşkenê zîndan de bimanê wayîr vejîyê, tewr lez bêrê veradayîş."

 

'Wa vernîya ma zîndanan de bo’

 

Hatîce tewr peyîn wina vat: "Ma pabeyê ke pawitoxê heqê merdiman, keye, çapemenî û rayaumûmî derheqê zîndanan de her tim hîsgêr bê. Ganî yê teberî vengê xo berz bikerê. Ma vînenê ke heta ke nêbo hemparê têkoşînî, şer û şerê înan, tu netîceyêk nêkeno bi dest. Ganî ê tu wext fek vera nêdê.”