Elfazî  Toral

 

STENBOL - Dayîkê Aştiye yê verê Zîndanê Bakirkoyî de çalakîya “Veng Azadîye rê” dewam kerdî û vatî: “Heta ke veng nêro dayîş û tecrîd bi peynî nêbo, ma do gama xo peyser nêerzê. Ma do serê rêça tutanê xo de bê. Dayîkê Aştîye vatî, "Heqê nê şarî yo ke tepişteyê ke zindan de yê, bipawê” û veng dayî her kesî ke vengê xo yê "azadîye" berz bikerê.

 

Tepişteyê sîyasî yê zîndanan, bi taybetî Rayberê PKKyî Abdullah Ocalan ke Îmrali de binê tecrîdêk giran de yeno tepiştiş û 41 aşmî yo agahî ci ra nîna girewtiş, binê tecrîdî de yê. Merdimê tepişteyan têkoşînê xo yê hemverê polîtîkayê tecrîdî dewam kenê.

 

Ma Înîsiyatîfê Dayîkê Aştîye yê Stenbolî reyde qisey kerd û amancê çalakîya înan ê derheqê çalakîya "Biciwîyo azadî" ke hetê merdimê tepişteyan ra ameya destpêkerdiş, kerd.

 

Zîndanan de xoverdayîş!

 

Sabîha Bozan, dîyar kerd ke bi serran o pêro zîndananê Kurdistan û Tirkîya de tecrîdêk giran est o û ard vîr ke tepişteyan hemverê polîtîkayê tecrîdî demêk derg o grevê vêşanîye dewam kerdî. Sabîha, bale ant ke çalakîya grevê vêşanîye agêraya boykotê nêpêvînayîşî û vat, “Tepişteyan demêk derg çalakîya xo dewam kerd. 

 

'Çira Rayberê ma reyde pêvînayîş nîno kerdiş?' 

 

Sabîha wina dewam kerd: "Çira Rayberê ma reyde pêvînayîş nîno kerdiş? Çarçewaya çalakîya tepişteyan de pê ame. Na çalakî ke tepişteyan xo ver dayîne bî. Zîndanan de xoverdayîşêk pîl yeno kerdiş.”

 

'Ma do serê rêça tutanê xo û dewaya xo de bê'

 

Fatma Yilmaza ke verê zîndanî de ya wina vat: “Semedê israrê têkoşînî yê bi serran o yeno kerdiş, ma tîya yê. Bi berzkerdişê vengê xo ma têkoşîn hîn pîlêr kenê. Wa tu dayîke hêsran nêvaro. Çi beno wa bibo ma do berê zîndanan terk nêkerê. Ma do serê rêça tutanê xo û dewaya xo de bê. Pêwa pêro tedayê verê berê zîndanan ma xo ver danê, ma sere nêtewênenê. Heta ke destûr nêro dayîş, ma bi israr ê. Ganî her kes xo ver bido û tutanê xo bipawê. Ma aştî wazenê. Dem ameyo ke ma bibê yew. Demê serkewtişî yo, demê xoverdayîşî yo, roja yewî û serewedaritişî yo."

 

'Tecrîd şerî tewr kûr keno'

 

Guler Bugday zî wina vat: "Şexsê Birêz Abdullah Ocalanî de bi mîlyonan kurdî binê tecrîdî de yê. Bi hezaran kurdî zîndanan de yê. Tecrîd sûcê merdimayî yo. Tecrîd şerî tewr kûr keno. Heta ke tecrîd dewam bikero, do gonî û şer zî dewam bikero. Her çî dorê tecrîdî de vindeno. Tecrîd yeno manaya her çî. Kes nêzano tepişteyî mîyanê çar dêsan de çi ciwîyenê. Hukmat goş nêdano înan. Tepişteyî bi pêro hêzê xo xo ver danê.”