WAN - Hemşaredaran dîyar kerdî ke hukmat dimayê weçînayîşê îdarekarîyê herêmî zî hêrişê xo yê hemverê kurdan bêmabêne dewam keno û bi ziwanê xo yê dayîke mesaj dayî ke ê do hemverê hêrişan de bê.

 

Sîstemê AKP-MHPyî polîtîkayê xo yê mêtingerî yê kurdan ser dewam keno. Desteserkerdişê welatijan bi deyîranê kurdî govende kerdêne dewam keno û tewr peyîn îqazê kurdkî yê ke serê rayîrê Mêrdîn, Amed û Wan de amebî nuştiş, ameyî wedaritiş. Ma mîkrofonê xo dergê Hemşaredara Dêrsimî Bîrsen Orhan, Hemşaredara Artuklu Mûnevver Olker û Hemşaredara Silopiya Jiyan Ormanli kerd. Hemşaredaran vatî: "Hukmat bi dişminîyê kurdan hewl dano xo awan bikero."

 

'Semedo ke weçînayîşê herêmî de vindî kerdî coka hêriş kenê'

 

Hemşaredara Dêrsimî Bîrsen Orhane wina reaksîyon mojna: “Bêtehamuliyê xo yê ziwan û hunera kurdan ser polîtîkayê xo yê dişminî dewam kenê. Dimayê vînîkerdişê xo yê weçînayîşê herêmî yê 31ê Adare de, Wan û Colemêrg bi qeyûman hewl da bîyayîşê xo dewam bikero. Semedo ke weçînayîşê herêmî de vînî kerdî, coka hêriş kenê. Nika a xebata xo dewam kenê seba nêverdayîş û vernîgirewtişê hewildayîşê şaredarîyan. Bi rayîrê pakêtê teserûfî nêverdenê şaredarîyê DEM Partî xizmet bikerê."

 

'Ziwanê ma kulturê ma yo'

 

Hemşaredara Artuklu Mûnevver Olker zî wina vat: “Ziwanê ma kulturê ma yo. Ez nê nêzdîbîyayîşê ziwanî ser û kulturê ma ser şermezar kena. Sewbîna ma eşkenê vajê ke sebebê nê hêrişê hemverê kultur û ziwanê kurdî serkewtişê weçînayîşê herêmî yê 31ê Adare yo. Ziwanê ma qeydê fermî de sey 'ziwanê nenas' yan 'x' ameyo nuştiş. Ganî her kes bizano ke ziwan û hunerê ma est o, tarîx de metnê ma bi ziwanê dayîke ameyê nuştiş est ê. Eynî wextî de ma do bîyayîşê xo dewam bikerê û ziwanê xo dayîke gane verdê.”

 

 

'Ganî nê nêzdîbîyayîşê nîjadperestî lezkî peynî bibê'

 

Hemşaredara Silopiya Jiyan Ormanli zî wina qal kerd: "No çî mojneno ke qirkerdişê kulturî hema zî dewam keno. Na rewşêke ke nîna qebûlkerdişî ya. Hêrişê hemverê rûmetê merdiman, heqê merdiman, şexsê merdimî û heqê komelî yo. Ganî nê kerdişî peynî bibê. Qiseykerdişê ziwanê dayîke heqê unîversalî yo. Heqê her kesî est o ke biziwanê xo xo îfade bikero. Ganî bieşko bi hawayêkê asan rêzikê trafîkî fam bikero û bişuxilno. No hemverê ziwanê fermî nîyo, hemverê huqûqî nîyo. No heqêk qanûnî yo. Hêriş bi tenê seba sebebê nijadperestî yenê kerdiş."