WAN - Parlamentera DEM Partîye ya Wanî Gulcan Kaçmaz Sayyîgît reaksîyon vera nê mojna ke Meydanê Kentî yê cadeyê tewr qelebalix ê bajarî hetê polîsan ra ameyo ablûqakerdiş û bîyo merkezê kombîyayîşê polîsan û wina vat: "Meydanê Kentê ma zî bi barîkatan ameyo padayîş û asteng kenê."

 

Meydana Kentî ke serê Kuçeyê Cumhuriyetî yê Wanî de semedê şarî ame qedexekerdiş. Meydanê bajarî ke tenê semedê hedîseyê walî û hukmatî yeno şuxilnayîş, polîtîkaya şerê taybetî yê hukmatî yê Kurdistanî fîneno verê çiman. Raşteyo ke bîyo merkezê kombîyayîşê polîsan û her hetî ra bi barîkatan ameyo ablûqakerdiş, tesîrêk negatîf temamê şarî rê keno. Tewr peyîn Parlamentera Partîya Têduştî û Demokrasî (DEM Partî) ya Wanî Gulcan Kaçmaz Sayyigit hesabê xo yê medyaya dîjîtale ser o Meydana Kentî ke raşteyê pêroyî yo, şarî rê yeno qedexekerdiş, reaksîyon vera na rewşe da. Gulcane derheqê ablûqa yê Meydanê Kentî de ajansê ma rê qisey kerd.

 

'Heqo tewr xozayî yeno desteserkerdiş'

 

Gulcane, ard ziwan ke Meydanê Kentî bêfonksîyon o û tenê sey raşteyê pêvînayîşî yê polîsan yeno şuxilnayîş û wina vat: “Rastî de raşteyêk ke cinî û tutî bi rehetî pîya demê xo derbaz bikerê lazim o. La tenê  Meydana Kentî de nê, wexto ke ma parkan ra ewnîyenê zî eynî rewşe est a. Her ca bi barîyerê polîsan ameyo ablûqakerdiş. Şarê Wanî xo rê uca de boya xo dayîne, yan zî kom bîne la no çî yeno desteserkerdiş. Ma hemverê nê çî yê. Ma fikrîyenê ke na rewşa ke ma qebûl nêkenê û rast nêvînenê, ganî werte ra bêro wedaritiş.”

 

'Mesajê 'ma dewletêke polîsan ê û ma do tîya bê’ rayaumûmî rê yeno dayîş

 

Gulcane, dewam de wina vat: "Ganî ma nefes bigîrê. Ganî şar şaredarîyan, îdarekarîyê herêmî yê demokratîke, paradîgmaya demokratîke ya ekolojîke, azadîya cinî, raşteyê ke merdimî kom bibê, bi asanî nefes bigîrê û hîna zêde rehet bibê, bêrê awankerdiş. Nê wareyî de zî cigêrayîşî yenê kerdiş. Rastî de rayaumûmî rê mesajê, 'Ma tîya yê, ma dewletêke polîsan ê û ma do tîya bê' est o. Ma nê mesajî qetî  qebûl nêkenê û şermezar kenê. Nê semedî ra zî lazim o astengîyê tîya lezkî bêrê wedaritiş û Meydanê Kentî rayaumûmî yê Wan de ciwîyenê bêro akerdiş. Meydanê Kentê ma zî bi barîkatan ameyo padayîş. Ma reyke bîn bi rayîrê çapemenîye vanê, Meydanê Kentî verdê, wa tîya bibo cayê ke merdim bi xususî cinî û tutî û heywanî kom bibê û boya xo bidê.”