Gulîstan Gulmuş

 

MÊRDÎN - Qoserîyijan hemverê vayîya semedê ceryan, awe, zibil û mazotî reaksîyon mojna û şewatê Şemrex û Çinar de vejîyabi ard vîr û vatî: “DEDAŞ ceryan vay keno, ceryan birneno, nêwazeno berardişê ma bibê. Şarê ma perîşan kenê.”

 

Partîya Têduştî û Demokrasî 19ê Temmuze de Qoserê Mêrdînî de kampanyaya ‘nan û edalet’ deklere kerd û mîtîngêk viraşt. Welatijê ke tewrê mîtîngî bî, dîyar kerdî ke polîtîkayê îqtîdarî hem înan feqîr kena û hem zî şewato ke DEDAŞ veto de Çinar û Şemrex de merdimê xo vînî kerdê.

 

‘Zibil, derman û mazot zaf vay o’

 

Fatma Toprak ke vernê de qisey kerd vat: “Her rey ceryan birnenê. Awa ma zî birnenê. Ma bêawe û hem zî bêceryan manenê. Ma înan protesto kenê. Pêwa ceryanê ma birnenê zî vayî zî zêde kenê. Ma wazenê erjanî bibo. Zibil, derman, mazot zaf vayê.”

 

‘Pêwa ceyran birnenê her çî vay o’

 

Vehîbe Aksu zî wina vat: “Nê çîyan Erdogan keno. Her çî vay o. Semedo ke merdimî serê linganê xo de nêvindenê, nê kenê. Ganî her kes qisey bikero û wayîrê keyeyê xo vejîyo. Pêwa awe û ceryanê ma yeno birnayîş, her çî vay o. Berpirsîyarê nê Erdogan o.”

 

‘DEDAŞî ma veşna’

 

Halîme Uçyanmazî wina qal kerd: “Şar sîstemo bîyaye ra pelçiqî yo. DEDAŞî ma perîşan kerd. Çinar û Şemrex de şewat vejîya. Ma xo nêresna înan. Ma nêbî hetkar. Ma kamerayan de vîna ke adir têlê ceryanî ra keweno. DEDAŞî ma veşna. Wazenê ma bikişê. Wa berpirsîyarî cezaya xo biancê.”

 

‘DEDAŞî ra 15 kesî dinyaya xo bedelnaye’

 

Zehra Mutlu zî wina reaksîyon mojna: “Şewat de 15 kesî dinyaya xo bedelnayî. Ma terorê DEDAŞî şermezar kenê. DEDAŞ ceryan vay keno, birneno. Şarê ma perîşan beno. Merdimî nêeşkenê deynan bidê. Fature zaf zêde yenê. Semedê DEDAŞî 15 kesî dinyaya xo bedelnayî. No zulmê DEDAŞî yo. Ma edalet û têduştî wazenê.”