Rozerîn Gultekîn

 

STENBOL - Ayşe Yakupa ke atolya tekstîlî de şuxilêna wina vat: “Ma roje 12 saetan şuxilînê. Klîma çin a, sîgorta çin a. Ma hewteyêk nêşuxilîyê ma vêşan manenê. Camêrdî atolyayan de makîne de şuxilênê. Ê cinîyan ra hîna zêdeyêr pere qezenc kenê. Ganî nê şertî bêrê başkerdiş.

 

Tirkîya ke welatê tekstîlî ya, karkerî feqîrî reyde têkoşîn kenê. Wezîrê bazgirganî Omer Bolat aşma adare de da zanayîş ke Tirkîya sera 4 û 5 pîlbîyayîşî reyde, serra 2023ine de mîyanê welatê yewbîyaye yê Ewropayî de bîya yewine, mabêne welatê OECDyî de zî bîya diyîn, mîyanê welatê G20 de bîya çarine. La karkerî pare xo nêgînê. Ayşe Yakup ke Tarlabaşi ya Stenbolî de ciwîyena, atolya tekstîlî de şuxilêna û karê overloqî kena.

 

Bêklîma 12 saet mesayî

 

Ayşe dîyar kerd ke 10 serrî yo tekstîl de şuxilêna û wina vat: “Mi emrê tutî de dest pêkerd. Sinifa 8ine ra heta nika şuxilêna. Tekstîl de xebate zehmet a. Roje de ma 12 saetî şuxilênê. Klîma çin a. Germ o. Zimistanî zî ma cemidyenê. Şertê xebate qet baş nîyê. Sîgorteya ma çin a. Mîyanê hewteyî de ma şuxilênê, roja şeme zî ma nîmroje şuxilênê.”

 

‘Ma deyn gênê û bi deynan deynê xo danê' 

 

Ayşe vat ge-ge 3-4 aşmî veng manenê û zehmetî ancenê, wina dewam kerd: “Ma hewteyêk nêşuxilîyê ma vêşan manenê. Ma hewl danê roja xo xilas bikerê. Ma newe zewicyayê. Ma kîra de yê. Ma deyn gênê û bi deyn, deyn danê. Ekonomî zaf xiraba. Semedo ke sîgortaya ma çin a, qezayêk çîyêk bibo ma mecbûrî ewnîyenê çareyê sereyê xo rê.”

 

Camêrdî hîna zêde qezenc kenê

 

Ayşe tewr peyîn wina vat: “Ma hewceyê kesî nêbenê. Azadîya ekonomî muhîm a. Ma heqdestê xo hewtane gênê. Sîgorta, werd, rayîr zî ci de ma 20 hezar lîra qezenc kenê. Camêrdî makîne ser de yê, ê tewr zêde qezenc kenê. No sîstem bi serran o wina yo. Hûmara cinîyan tekstîl de kêmî bîya. Cinîyê ke zewicyenê êdî nêşuxilênê.”