Elfazî Toral

 

 STENBOL - Esnafe Nurcan Taybogan da zanayîş ke  hem hetê karsazan de hem hetê karkeran de barê debare giran bîyo û vat: “Semedê rîyê esnafan bihuyo ganî krîzê ekonomî bêro çareserkerdiş. Ganî lezkî krîzê Tirkîya bêro çareserkerdiş.”

 

Tirkîya de krîzê ekonomî her ke şino giran beno û welatî roj bi roje tewr zêde kewenê zehmetîyan. Sere de cinî hêzê girewtişî yê pêro welatijan roj bi roje keweno. Nê semedî ra esnafî zî zehmetîyê pîlî ancenê. Hem welatijî hem zî esnafî krîz kurayî hîs kenê. Esnafe Nurcan Taybogan têkoşînê ke bi serran o kena û texrîbatê krîzê ekonomî JINNEWSî rê qal kerd.

 

Keyeyê Nurcan Taybogan 1996ine de semedê polîtîkayê asîmîlasyonî û tedayê dewletêe Mêrdîn ra koçî Stenbolî keno. Nurcan o wext 9 serrî bena. Emrê qijî de polîtîkaya înkar, îmha û asîmîlasyonî nas kena. Keyeyê înan hetê ekonomî de zehmetîyê pîlî ancena. Nurcane wina vana: “Bi hetkarîya merdimanê xo mi tekstîl de dest bi xebate kerd. Demo ke ma ameyî tîya, ez zaf qij bîya. La mi dest bi xebate kerd. Mi hetê ekonomî de paştdayîş da keyeyê xo. Qijî ra nê karî kena. Cuya min a mektebî çin bî. Mi karê xo bi heskerdiş kerdo.

 

İsrar…

 

Nurcane dîyar kerd wexto ke karê xo awan kerda 20 salî serrî bîya û vat: “Ez kesêke jîr û jîyatî ya. Mi karê veyvî, karê pûncan kerd. 2004ine de mi kargehê xo akerd.  Bi hewldayîşêk pîlî serê lingan de vinderta. Mi bi makîneyêk qij dest bi nê karî kerd. Ez xeylêk karî reyde eleqeder bîya. Ez her tim xo ra bawer bîya. Mi tu wext nêvat ez nêeşkena bikerî, mi moralê xo xira nêkerd. Bêşik demê zehmetî ameyî ciwîyayîş la ez xo ra bawer bîya.”

 

‘Ganî rîyê esnafan bihuyo’

 

Nurcane wina qedêna: “Ma krîzê ekonomî ra xeylêk tesîr bîyî. Krîzê ekonomî reyde ma pîl bibê, ma her ke şî qij bî. Vernîya pandemiyê zî û pey pandemî zî çi heyf wina bî. Şertî her ke şî giran bî. Hem barê karsazan, hem barê karkeran yê debare zehmet bî. Şîyayîî zêde yo la ameyîş çin o. Ma esnafî her ke şinê qij benê. Ganî Tirkîya de krîz bêro çareserkerdiş. Ancax çareser bibo ma do pîl bibê. Semedê rîyê esnafan bihuyo ganî krîzê ekonomî bêro çareserkerdiş.”