Rozerîn Gultekîn

 

STENBOL - 29ê Hezîrane de hemverê qeyûman do Wareyê Kartalî de mîtîng pê bêro. Cinîyan semedê mîtîngî veng dayî û dîyar kerdî ke yewîya hêzî reyde eşkenê peynîya polîtîkaya qeyûmî bîyarê û venga tewrbîyayîşê mîtîngî pêro kesan kerdî ke vengê xo berz bikerê.

 

Hemsereka Pêroyî ya Komeleya Demokratîke ya Elewiyan (DAD) Kadrîye Dogan da zanayîş ke qeyûm tayînê şaredarîya Colemêrgî bîyo û vat: “No qeyûm tayînê cuya komelî ameyo kerdiş. Qeyûm yeno manaya çinkerdişê îradeyî, nênaskerdişê bîyayîşê komelî. Mumkin nîyo ma nê qebûl bikerê. Ê çiqas vajî zî şima çin ê, ma do xo ver bidê û serbikewê. Stenbol ra heta Colemêrg, hêz û yewîyêk est o û qeyûman ra vanê nê. Ma wazenê Viyan Tekçe sey şaredara Colemêrgî bivînê. Vîyane rê nêheqîyêk pîl yeno kerdiş.”

 

Semedê mîtîngî vengdayîş

 

Kadrîye venga mitîngî pêro şarî kerd û vat: “Hedefê ewilî yê qeyûman oyo ke cinîyan îdarekarî, prosesê awankerdişê cuye ra dûrî bifînê. Qeyûm tayînê pêro cuye yeno kerdiş. Tayînê bawerîya elewîyan, xozaye yeno kerdiş. Ma do hemverê nê de Kartal de vengê xo berz bikerê. Bi taybetî ganî cinîyê elewî, komelê elewî wa ware de bê.”

 

‘Ganî bajarê rojawanî ra veng bêro berzkerdiş’

 

Hemsereka DEM Partî ya Kadikoyî Serap Borucu zî wina vat: “Îqtîdarê AKP-MHPyî, destkewtişê DEM Partîye yê Kurdistanî hezm nêkerd û nê semedî ra wazeno şaredarîyan bigîro. Ewil Wan ra destpêkerdî û şar xo ver da û peyser girewt. Do Colemêrg de zî hemverê qeyûman de xo ver bido. 29ê Hezîrane de Kartal de mîtîngê ma est o. Ma pêro hêzê muxalîfî dawetê mîtîngî kenê.”

 

‘Ma do hêzê xo Kartal de bimojnê’

 

Endama Heyetê Îdarekarîya Partîya Paştdayîşê Sosyalîst (SODAP) Fatma Înce zî wina vat: “Bi hîrê demî yo polîtîkayê qeyûmî pê yenê. No caardişêk hemverê têkoşînê cinîyan yeno kerdişî yo. Ma do Meydanê Kartalî de hemverê qeyûman vengê xo berz bikerê. Ma do hêzê xo Kartal de bimojnê.”

 

'Hemverê çinhesibnayîşî'

 

Endama Komîsyonê Zîndanan ê Şubeyê Komeleya Heqê Merdiman (ÎHD) ya Stenbolî Meryem Bars zî wina vat: “Qeyûm xespkerdişê îradeyê şaran o. 29ê Hezîrane de ganî pêro cinî û hetê hîsgêrî veng bidê nê mîtîngî. Hem îradeyê şarî, hem şar çin yeno hesibnayîş. Ganî ma cewabê nê bidê. Ma do heqê înan bipawê. Eke ma veng berz bikerdêne do nê çî nêameyîne meydan.”