Elfazî Toral

 

STENBOL - Verfeka Vengê Cinîya Karkere Serpîl Topal xebatanê ‘vengê cinîya karkere’ ercna û vat: “Sere de semedê waştişê cinîyan bêrê vînayîş, hemverê binpaykerdişê keda karkeran, ma perspektîfê Vengê Cinîya Karkere, pêşnîyaz kenê.”

 

Tirkîya de feqîrî her ke şina giran bena û tesîrêk pîl serê cinî, karker û kedkaran kena. Goreyê Konfederasyonê Sendîkayê Yewbîyaye yê Îstîmlakî yê Karkeran (Bîrleşîk Kamu-ÎŞ) yê aşma Gulane ya 2024ime sînorê vêşanîye 19 hezar û 926 o, yê feqîrî zî 59 hezar û 353 TL yo. Karker û kedkarî nêeşkenê lazimîyê sereyîn bigîrê û kargeriyan de zî şîdet sewîyeya tewr cor de yo. 28ê Nîsana 2024ine de xebata ‘Vengê Cinîyan Karker’ ame awankerdiş û bi nê perspektîfî berzkerdişê têkoşînê azadîye yê hemverê binpaykerdişê keda cinî yeno pêşnîyazkerdiş.

 

Têgêrayîşê Karkerê Yewbîyaye (BÎH), Sendîka Karkerê Viraştişê Keştî, Vurnayîşê Behrî, Ardiye û Antrepololî (LÎMTER-îş) û Vengê Cinîya Karkere  ‘Sempozyumê seserra 21ine de têgêrayîşê karkeran, tecrube û hewldyîşî’ kerdî. Sempozyum di rojan dewam kerd. Verfeka Vengê Cinîya Karkere Serpîl Topal perspektîfê ‘vengê cinîya karkere’ ercna û vat, do têkoşînê azadîye berz bikerê.

 

Hemverê binpaykerdişê kede perspektîfê vengê karkera cinî!

 

Serpîle da zanayîş ke demêk derg o derheqê Vengê Karkera Cinî de xebatan kenê û vat: “Demêk derg bî ma karkerê cinî yê fabrîqeyî reyde xebate kerdî. Ma metodê cîya şuxilna û xo deklere kerd. Bi hawayêkê rêxistinkerde ma xebatan kenê. Ma vatêne ganî têkoşînê azadîya cinî bi têkoşînê hemverê binpaykerdişê kede de bibo yew. Ma têkoşînê komelî berz kenê û cinîyan reyde têkoşîn awan kenê. Vengê Cinîya Karkere perspektîfêk hempar ê xebate yo.”

 

‘Ma perspektîfê Vengê Cinîya Karkere pêşnîyaz kenê’

 

Serpîle wina qiseykerdişê xo peynî kerd: “Perspektîfêk ma est o û ma wazenê pêro cinî  têkoşîn de xo bi rêxistin bikerê. Ez semedê sinifa karkeran zî vana, semedê têkoşînê azadîya cinî zî vana. Hemverê binpaykerdişê keda cinî pratîkêk têkoşînî est o. Ma vanê ke ganî cinî bi hawayêk kolektîf bi îradeyê xo tîya ca bigîrê. Ma semedê nê zî perspektîfê vengê cinîya karkere pêşnîyaz kenê.”