Şehrîban Aslan- Pelşîn Çetînkaya

 

AMED - Cinîyê herêma ke felaket uca de ame ciwîyayîş, dîyar kerdî ke bi 2 aşmî yo dewe de ceyran çin o û şîn de zî ceyran çin o û semedê meymanê ke yenê şîn, serê adirî de çaye viraznenê.

 

Şewa 20ê hezîrane de dewa Kelekî ya Şemrexê Mêrdînî û dewa qezaya Çinarê Amedî yê Tobînî û Herberî de şewat vejîya. Şewatî de 15 kesî dinyaya xo bedelnayî û goreyê dayeyê Wezaretê Daristanî û Ramitişî 924 heywanî telef bîyî, bi hezaran hektar ware zî çîn bî. Derheqê şewatî de cipersayîşo ke ameyo destpêkerdiş dewam keno. Raporê ewilî de ame tespîtkerdiş ke şewat semedê ceyranî virazîyayo. Heto bîn ra dewa Kelekî ra 10, Tobînî 2 û Herberî ra zî 3 kesî dinyaya xo bedelnabî, ameyî definkerdiş.

 

Kesê ke dinyaya xo bedelnabî nameyê înan wina yê: Resul Yilmaz, Şeyhmus Demîr, Mezher Demîr, Remzî Yilmaz, Îsmaîl Yardimci, Abdurrahman Bugdayci, Sînan Devîren, Rezan Yilmaz, Azad Yilmaz, Taliha Demîr, Nurî Demîr, Fadil Demîr, Kerîme Erdenli, Ubeydellah Bugdayci, Halîme Erdem.

 

Semedo ke dewlete mudaxaleyê şewatê dewan nêkerd, bîlanço giran bî û hem dewijî, hem rayaumûmî reaksîyonê pîlî mojnayî.

 

‘Dimayê ke her ca wêran bî helîkopter ame’

 

Dewa Herberî ra Sultan Okra şewa ke şewat vejîya qal kerd û vat: “Me qîrayîş û hewarî eşnawitî. Ma şî ciyê şewatî. Ma cinî dî, cinî mîyanê adirî de veşayîne. Birayê aye, aye ko kerd û berd verê ambulanse. Ancî dewa ma de Îsmaîl zî mîyanê adirî de mendibî. Nêameyîne şinasnayîş. Pîyê ey engiştanê ey ra nas kerd. O zî dinyaya xo bedelnaye. Dewlete erey mudaxale kerd. Eke dewlete wextê xo de biameyîne, no nêameyîne ciwîyayîş. Homa heqê însan û heywanê ke veşayî nêverdo. Ancî yê ke ameyî hetkarîya ma DEM Partî bî, şaredarî bî. Dimayê ke her ca wêran bî, helîkopterî ameyî la xo ra her çî şî bî. Merdiman dinyaya xo bedelnabî.”

 

Serê adirî de çay viraznenê

 

Dewijan ra Husnugul Gulmuş zî wina vat: “Bi di aşmî yo ceyranê ma çin o. Vatî deynê ceyranî bidê. Ma deyn zî da ceyran vera nêdayî. Ma nika awe serê adirî de germ kenê û şîn de şuxilnenê. Semedo ke ceyran çin o, ma çaye wina viraznenê. Nika cayê  sey Stenbol, Anqara û Trabzon bibayîne, do selahîyetdarî bişîne ê cayan. Serekkomar semedê ma kurdan çîyêk nêkeno. Emser şaredarê ma ameyî weçînayîş. Zaf baş bî. 6 serrî verê ceyran mêrdeyê mi girewt. Çimê ey nêvînenê. Se ra 99 sûcê înan bî. Pêwa dewaya ma ameye vînayîş, heqê ma nêdanê. Sebebê nê zî hukmat o.”