MERKEZÊ XEBERAN - Temsîlkarê MRAPyî Gîanfranco Fattorînî roniştişê Heqê Merdiman ê 56ine ê NYyî de heqê qiseykerdişî girewt û bale ant serê tecrîdê Îmraliyî û caardişê qeyûmî yê dewleta tirkan. Gîanfranco waşt ke NY heyetêk bişirawo Îmraliyî.

 

Roniştişê Heqê Merdiman ê 56ine yê Konseyê Heqê Merdiman ê Neteweyê Yewbîyaye (NY) Ofîsê Cenevreyî yê NYyî de dewam keno. No roniştişo ke 18ê Hezîrane de dest pêkerd, do heta 12ê Temmuze dewam bikero. Roniştiş de binpaykerdişê heqê merdiman yê welatan de qewimyenê, ameyî ercnayîş û munaqeşekerdiş. Temsîlkarê Têgêrayîşê Dostanîyê Mabêne Şaran ê Hemverê Nîjadperestî (MRAP) ê NYyî Gîanfranco Fattorînî bale ant serê tecrîdê hemverê Rayberê PKKyî Abdullah Ocalanî û caardişî qeyûmî yê ke dewleta tirkan wazena bajarê Vakurê Kurdistanî de ca bîyaro.

 

Komîserê Berzî yê Heqê Merdiman ê NYyî Volker Turk zî salone de amade bî.

 

Gîanfranco Fattorînî bale ant serê tedayê dewlete yê bajarê Vakurê Kurdistanî û Tirkîya hemverê şarê kurdî de dewam kenê û wina vat: “Bajarê Tirkîya û Kurdistanî de tedayî dewam kenê û heqê bingehîn û azadîyê kesan bi rengêk sîstematîk yenê binpaykerdiş, ma hemverê nê de endîşeyîn ê.”

 

Gîanfranco Fattorînî bale ant serê şert û mercê tecrîdo ke Rayberê PKKyî Abdullah Ocaland mîyan de yo û wina vat: “3 serrî yo xebere Birêz Abdullah Ocalanî ra nîna girewtiş ke 25 serrî Zîndanê Girawa Îmraliyî de tepişte yo. 3 serrê peyînî de bi tu rengî nêeşkeno bi keye û avûkatanê xo reyde pêvînayîş bikero. Ma venga Konseyê Heqê Merdiman ê NYyî kenê ke heyetêk bişirawê Zîndanê Îmraliyî ke çîyê Başûrê Rojhelatê Tirkîya de qewîmyenê û şert û mercê ke Abdullah Ocalan mîyan de yo, bi rengêk xoser cigêrayîş bikerê.”