Oznûr Deger

 

MÊRDÎN - Çalakîkerê ke Şaredarîya Bajarê Girdî ya Mêrdînî û yê qezayanê ci de nobete de yê vatî, "Ma fek dewaya xo ra vera nêdanê. Heta ke qeyûm şêro do têkoşînê ma dewam bikero." 

 

Reaksîyonê hemverê tayînkerdişê qeyûmî yê Şaredarîya Colemêrgî ya Partîya Têduştî û Demokratîke (DEM Partî) ke hemşaredarê ci wezîfera ameyî girewtiş û hemşaredar Mehmet Sidik Akiş 19 serrî û 6 aşmî ceza ci rê ameye birnayîş û ame tepiştiş, dewam kenê. Dimayê nê DEM Partî 4ê Hezîrane de qerarê çalakîya nobete da û pêro şaredarîyan ra waşt ke saete mabêne 17.00 û 00.00î de nobeta hemverê qeyûmî de dest pêbikerê. Nobeta ke xeylêk kesî tewr bîyî û dewam kena, zîhnîyetp qeyûmî yeno şermezarkerdiş. 

 

'Wa şarê ma îradeyê xo bipawo'

 

Hemsereka DEM Partî ya Qezaya Artuklu Katîbe Îzgî vat, ê 4ê Hezîrane ra mîyanê çalakîyan de yê û wina vat: “Heta ma netîce bigîrê, ma do çalakîyanê xo dewam bikerê. Ma tîya pêro xebatkarê partîye û şarê xo yê welatparêzî reyde nobete gênê. Şarê ma paştdayîş dano şaredarîyanê xo û beşdarê çalakîye beno. Heta ke Şaredarîya Colemêrgî peyser bêra girewtiş, ma do mîyanê çalakîyan de bê. Ma venga  şarê xo kenê ke îradeyê xo bipawê.

 

'Heta ke qeyûm şêro do têkoşîn dewam bikero'

 

Hemsereka Qezaya Dêrikî ya DEM Partîye Kadriye Akar zî dîyar kerd ke welatijî her roje yenê verê awanî û wina vat: “Ma fek dewaya xo ra vera nêdanê. Ma do têkoşînê xo dewam bikerê heta ke qeyûm şêro. Ma şaredarîya xo bi îradeyê şarî girewt û lazim o şar îradeyê xo bipawo. Ma do heta peynî çalakîya xo dewam bikerê.  Ganî şarê ma zî pîya îradeyê xo bipawo. Heta ke Şaredarîya Colemêrgî peyaet bigîrê ma do têkoşînê xo dewam bikerê."

 

'Ma kurdî tim est bî’

 

Hemsereka Qezaya Şemrexî ya DEMî Zînet Çalim weçînayîşê herêmî ard vîr û wina vat: “Şaredarîyê ma yê ma yê. Ma kurdî her tim bîyî û ma bîyayîşê xo pawito. Ma nêwazenê bêrê peygoşkerdiş. Ma do îradeyê xo teslîmê înan nêkerê. Siba ma nêbê zî do tut û tornê ma îradeyê xo bipawê. Şarê ma ma reyde yo.”