ERZIROM - Dewa Velîbaba ya Xoresanî de goristanê aîdê armenîyan hedefê xezînadaran de yo.

 

24ê Nîsana 1915ine de hetê rêxistina Teşkîlat-i Mahsusa yê Cemaatê Îttîhat û Terakkî ra, 250 sîyasetmedar û armenî bi zor keyeyê xo ra ameyî girewtiş, surgunkerdiş û qetilkerdiş. No tarîx sey roja destpêkê qirkerdişê armenîyan yeno zanayîş. Şarê armenî, serê herra xo ra ame surgunkerdiş û qirkerdişê pîlî reyde ame rî bi rî. Heto bîn ra zî serê qirkerdişî ra 109 serrî derbaz bî û hema zî edelet pê nêameyo. Qirkerdişê armenîyan bî sembolê sîyasetê ke îqtîdar şaran rê meşrû vîneno. Destpêkê qirkerdişê hemverê rûm, suryanî, keldanî, kurd, elewî, êzidî sey qirkerdişê hemverê armenîyan yeno  ercnayîş.

 

Armenîyê ke ameyî qirkerdiş, hewl dîya ke pêro rêçê înan bêrê pakkerdiş. Goristan û dêrê înan mendê zî nika hetê xezînadaran ra yeno talankerdiş. Yew nê ra zî goristanê armenîyan yê dewa Velîbaba yê Xoresanê Erziromî yo.

 

Serê goran de awanîyê newe

 

Dewe de ewilî kurdê sey derwîş ameyîne binamekerdiş ciwîyayîne. Bi ameyîşê Tîmurî yê Rojhelatê Mîyanên, qirkerdiş dest pêkeno û derwîşê sey kurdî yenê zanayîş zî yenê qetilkerdiş. Dimayê qetilkerdişê derwîşan serranê 1600î de armenî dewe de ca benê. 1915ine de qirkerdişê armenîyan  reyde dewe ra yenê surgunkerdiş û aqûbetê înan zî nîno zanayîş. Dimayê armenîyan tenê goristanê aîdê înan mendî. Nê gorî nika hedefê AKP û xezînadaran de yo. Eynî wextî de hîn dewijan wareyê ke goristan ci de yê keyeyê newe viraştê.

 

Welatijê ke bi hîsgêr yê dewe de ciwîyenê, na rewşw qebûl nêkenê û wazenê goristanî bikewê binê pawitişî.