WAN - Cinîyê Wanî bale antî ser muhîmîyê çalakîya "Veng bide azadîye" û dîyar kerdî ke tecrîd huqûqî nîyo û merdimayî nîyo, ganî lezkî bêro peynîkerdiş.

 

25 serrî yo hemverê Rayberê PKKyî Abdullah Ocalanî de tecrîdêk mutlaq yeno kerdiş û 3 serrî yo zî tu xebere Abdullah Ocalanî ra nîna girewtiş. Hemverê polîtîkayê tecrîdî sere de Kurdistan, Tirkîya û xeylêk cayê dinya de çalakî yenê organîzekerdiş. 10ê teşrîna verêne de Ewropa de hetê dostanê kurdan ra bi sloganê "Abdullah Ocalanî rê azadîya fizîkî, meseleya kurdî rê çareserîya sîyasî" kampanyayêke ameye destpêkerdiş. 27ê Teşrîna Peyêne de tepişteyê sîyasî yê ke zîndanê Kurdistan û Tirkîya de zî paştdayîşê kampanyaye kerdî û dest bi grevê vêşanîye yê bi dor kerdî. Dimayê qonaxê diyîn ê kampanyaye 4ê Nîsane de tepişteyê sîyasî çalakîya xo vetî sewîyeyêka bîn û nêvejîyenê dadgehe. Keyeyê zî "Veng bide azadîye" çalakîyê Nobeta Edaletî dayî destpêkerdiş. 

 

Çalakîyê ke xeylêk bajaran de dewam kenê, çalakîkerî waştişê xo bi yew vengî ardî ziwan û venga edaletî kenê. Merdimê tepişteyan ajansê ma JINNEWSî rê qisey kerdî.

 

'Wa lezkî tecrîd bêro peynîkerdiş'

 

Guler Sevîklî, polîtîkayê tecrîdî şermezar kerd û wina vat: "Tecrîd hem hemverê Îmraliyî, hem zî hemverê tepişteyan û hem zî hemverê kesê ke teber de yê yeno kerdiş. Ma wazenê no tecrîd hetê pêro şaran ra bêro vînayîş. Zîndanan de bi hezaran embazê ma est ê. Ganî her kes hemverê tecrîdî de vengê xo berz bikero. Ganî şar êdî hişyar bo û veng vejo. Êdî bes o. Ma bi aşman o çalakîya Nobeta Edaletî dewam kenê. Çira vengê ê dayîkan nîno eşnawitiş. Ganî êdî pêro dinya vengê ê dayîkan bieşnawê. Wa lezkî tecrîd bêro peynîkerdiş."

 

'Ma azadîya Birêz Ocalanî wazenê'

 

Çalakîkera Nobeda Edaletî Meryem Soylu wina vat: "Tecrîd huqûqî û merdimayî nîyo. Her kes zî zano ke tutê ma zîndanan de dest bi grevê vêşanîye kerdî. Hemverê tecrîdê Birêz Ocalanî na çalakî ameye destpêkerdiş. Tarîx de çîyêk wina çin o ke tecrîdêk bi nê rengî bêro kerdiş. Tepişteyê sîyasî çalakîya xo vurnayî û nika nêkewenê pêvînayîşan. Êdî tepişteyî venga azadîya Birêz Ocalanî kenê. Ganî reaksîyonê xo hemverê tecrîdî de bîyarê ziwan." 

 

'Hemverê zulmî de sere wedarnê'

 

Caziye Gur zî wina vat: "Ma tecrîd qebûl nêkenê. Her roje şer û her roje tepiştiş. Çi heqê înan est o ma rê wina kenê. Ganî şarê kurdî hewn ra aya bo û sere wedarno. Ne tutî û ne zî wayê û bira mendî. Ma her roje bi merg, destbendkerdiş û tepiştişan reyde rî bi rî yê. Ganî şarê tirkî zî hemverê nê zulmî de sere wedarno. Semedo ke zulm tenê hemverê şarê kurdî de nîno kerdiş. Ganî pêro şar pîya wurzo. Wa no zulm werte ra bêro wedaritiş. Ez tenê aştîye wazena.”