Melek Avci

 

ANQARA - Parlamentera EMEPÎ Sevda Karaca ard vîr ke şarê kurdî demêk derg o heqê raydayîş û weçînayîşî de çin o û vat: "Ganî ma reyke bîn bîyarê vîr ke polîtîkaya qeyûmî hacetêk taybetî yê hemverê heq û destkewtişê cinîyanê kurdan şerêk taybetî yo.”

 

3yê hezîrane de Şaredarîya Colemêrgî ya Partiya Têduştî û Demokrasîyî yê Şaran (DEM Partî) qeyûm ame tayînkerdiş û reaksîyonê hemverê tayînkerdişê qeyûmî xeylêk bajaran de dewam keno. Xeylêk bajaran de nobetî ameyî destpêkerdiş û çalakî ameyî organîzekerdiş. 

 

Parlamentera Partîya Kede (EMEP) yê Dîlokî Sevda Karaca ajansê ma JINNEWSî rê qisey kerd û bale ant serê xoverdayîşê şarî. 

 

Çi asayî yo yan asayî nîyo?

 

Sevda, dîyar kerd ke weçînayîş de AKPyî darbeyêk werd û vat: "Tabloyê ke hetê şarî ra ame dayîş mîyanê AKPyî de bi sebebê munaqeşeyan. Ame vînayîş ke êdî mîyanê şarî de meşrûtîyetê AKPyî nêmendo. Ercnayîşê mîyanê AKPyî de munaqeşeyêk, nakokîyêk, hewldayîşêk demokratîkbîyayîşî est o la MHP nêverdeno. Prosesê derbazbîyayîşî de Doza Kobanî û Gezî prosesê 1ê Gulane de destbendkerdiş û tepiştiş, destbendkerdişê ciwanê ke seba Fîlîstînî verê sazgehê sermayedaran çalakî organîze kerd, nê çî  fêmkerdişê prosesê asayîbîyayîşî yo. Tabloyê ke çi asayî yo û çi asayî nîyo nîşan dano. Ganî no proses bi di hetî bêro destgirewtiş, yew problemo sereyîn yê kurdî, yê bîn zî feqîrîyê Tirkîya yo."

 

Averşîyayîşê berjewendîyan

 

Sevda, dewam de wina vat: "Şirnex û Colemêrg de xeylêk leşkerî ameyî bicakerdiş û rayî ameyî şuxilnayîş. Tîya taybetmendîyê ci est o. Nika seba bîyayîşê xo Rojhelatê Mîyanên de ispat bikero, seba berjewendîyê xo û berjewendiyê emperyalîzmê Amerîkayî, hemverê Vakur û Rojhelatê Sûrîye, Rojawan û vakurê Iraqî gamê neweyî erzenê. Hetêk ra bîyayîşê xo mîyanê mîyanneteweyî de pê bîyaro hesabê mende keno. Zext şarî rê kerdî, leşkerî ardî, qeyûm tayîn kerdî, bi şîdet waştî ke bi ser kewê. Labelê nêeşkayî nê herêman de ser bi kewê.”

 

Hemverê cinî û tutan de sîyaset...

 

Sevda, tewr peyîn wina vat: "Ma sîyasetê qeyûmî bi her awayî ercnenê. Ma reyke bîn anê vîrê xo qeyûm hemverê destkewtişê şarê kurdî şerêk taybet dayo destpêkerdiş. Têgêrayîşê cinîyê kurdî bi têkoşînêk bi serran paştdayîşê cinîyan pîl kerd, sazgeh û dezgehê cinîyan akerd. Labelê dimayê polîtîkayê qeyûman her çî ame serûbinkerdiş. Sazgeh û dezgehê ke hemverê şîdetê cinîyan de kar û xebatan kerdêne, yew bi yewe ameyî padayîş. Qeyûm zî bi polîtîkayê xo cinîyan sey makîneyê welidnayîşî mojna, cinî çin hesibna û wezîfeyê koletî da cinîyan. Merkezê paştdayîşî vurna dibistanê zewicnayîşî. Xeylêk merkezê cinîyan dewrê weqfan kerd. Ganî ma bizanê ke bi tayînkerdişê qeyûman hemverê cinî û tutan de siyasetêk yeno kerdiş.”