STENBOL - Meclîsê ÎSÎGî neql kerd ke 5 aşmî ewilî yê serrî de 738 karkeran dinyaya xo bedelnayî. Nê  karkerê ke dinyaya xo bedelnayî 5 ci ra cinî û 2 ci ra zî tut ê. 

 

Meclîsê Weşîye Kar û Asayîşê Karkeran (ÎSÎG) “Raporê Cînayetê Karî yê 2024ine” pare kerd. Goreyê raporî; 5 aşmê ewilî yê serrî de 738 karkeran “cînayetê karî” de dinyaya xo bedelnayî. Rapor de ame vatiş ke goreyê dayeyê merdişan, her 5 rojan reyke karkerêk dinyaya xo bedelnayo, aşma çeleyî de 161, sibate de 149, adare de 124, nîsane de 165 û gulane de zî 139 karkeran dinyaya xo bedelnayî. 

 

 

ÎSÎGî da zanayîş ke aşma gulane de 139 karkeran dinyaya xo bedelnayî û nînan ra 15 ci Stenbol de, 8ê ci Bursa, 7ê ci Enqere, 6ê ci Riha û 5ê ci zî Aydin de dinyaya xo bedelnayî. Karkerê ke gulane de dinyaya xo bedelnayî 39 ci beşê înşaet û rayîrî, 25 ci karkerê ramitişî û daristanan, 22 ci sektorê resnayîşî, 8ê ci  karê metalî û 7 zî beşê karî yê hewînî bîyî. Sewbîna  rapor de ame dîyarkerdiş ke karkerê ke dinyaya xo bedelnayî 5 ci ra cinî û di zî karker ê.