Zelal Tunç

 

WAN - Nêzdîbîyayîşê roşanî reyde welatijê ke şinê bazaran seba krîzê ekonomî yê her ke şino giran beno nêeşkenê lazimîyê xo yê sereyîn ê cuye bigîrê. Xeylêk welatijan dîyar kerd ke tenê roşanan de eşkenê goşt bigîrê û xeylê xo zî vatî, nîno vîrê înan ke key qurban girewtê.

 

Welatijê Wanî derheqê krîzê ekonomî û pêşwazîkerdişê roşanî de fikrê xo ardî ziwan.

 

‘Ez qurban bigîrî ez o senî debare bikerî’

 

Nuray Sahan ke hewl dana debare xo bikero wina vat: “Min 300 TL mêrdeyê xo ra girewt û ameya bazar. Sebze kam ci tezgahî de erjan bo uca ra gêna. Mi seba sebze 80 TL da. Rewşa ma wina ya, ma do senî qurban bigîrê? Mêrdeyê mi 10 hezar meaşê teqawîtbîyayîşî gêno. Bi nê pereyî ewnîyeno çar nifûsî ra. Her çî vay o. Lajê mi 9 hezar û nîm pere da qurban. Mêrdeyê mi bigîro do pêro meaş şêro uca. Ma do ancî senî debare bikerê.”

 

'Sebeb AKP yo'

 

Şadiye Ertunç zî wina vat: “Mi tenê di kîlo çî girewtî. Tutê ma baş wey nêbenê. Ez TOKÎyê Artemîtî de kîra da ya. Tutê min ê astengdar est ê. Ma bi 3 hezar meaş debare kenê. Ez tenê roşan de goşt gêna. Vayîya qurbanan 15 hezarî ya, ma senî bigîrê? Îqtîdar her roje vayîyan zêde keno. Seba krîzê ekonomî her çî qediya. Sebebê nê AKP yo.”

 

‘Sebebê vaybîyayîşî Erdogan o’

 

Kurdistan Adiyaman zî wina reaksîyon mojna: “Yê ke qurbanan gênê zî bi merdimanê xo reyde pare kenê. Her çî vay o. Kîloyêk goşt bîyo 700 TL. Rojane merdimêk 300 TL yo. Nika do senî qurban bigîrê. Sebebê nê vayî Erdogan o. Ma 8 nifûs ê. Ma nêeşkenê debara xo bikerê.”

 

‘Qurban caverde ma nêeşkenê kerge sere bibirnê’

 

Cevahîr Demîr zî wina reaksîyon mojna û wina vat: “Ma dewa Xokanî ya Elbaqî de ciwîyenê. Seba betalî ma mecbûr mendî bêrê. Yewin çimeyê debara mi aşmaneyê min o. Tu ameyîşê ma çin o. Ma do nê roşanî de zî bê goşt bê. Ma verdê qurban, ma nêeşkenê kerge sere bibirnê.

 

Maşallah Urgan zî dîyar kerd mêrdeyê aye nêxebityeno û wina vat: “Vistewraya mi nêweş a, mîyanên cilan de ya. Mêrdeyê mi nêxebityeno. Ma 8 nifûs ê. Tu ameyîşêk ma çin o. Nîno vîrê mi tewr peyîn me key qurban girewto.”