MERKEZÊ XEBERAN - Karîkaturîste Atena Ferqidanî bi bahaneyê ke hunerê xo hemverê rejîmê Îranî şuxilnaya, 6 serrî cezaya zîndanî ci rê dîya.

 

Karîkaturîste Atena Ferqidanî hetê liqê 26ine ê Dadgeha Şorişî yê Tehranî ra bi bahaneyê di tometanê cîya, 6 serrî cezaya zîndanî aye rê dayî. 

 

Avûkatê Atena Ferqidanî, Mihemed Moqîmî metodê dadgehkerdişî û cezakerdişê Atena bi ‘qerarêk tîyatroyî’ bi name kerd.

 

Goreyê agahîyê ke ameyî vilakerdiş, 9ê Hezîrane de qerarê peyîn ameyo dayîş. Sewbîna 10ê Hezîrane de hunermende Atena û avûkatê aye rê ameyo neqlkerdiş ke bi tometê ‘heqaret çîyanê pîrozkerdişî’ 5 serrî û bi tometê ‘propagandayê hemverê hukmatî’ zî serrêke cezaya zîndanî aye rê ameya birnayîş.

 

Karîkaturîst Atena Ferqidanî 13ye Nîsane de demê ke yew berardişê xo kuçeyê Pastori yê Tehranî de serê dêsêk de viraştêne, bi metodêk şîdet amebî destbendkerdiş û dima ra berdîya Zîndanê Cinîyan ê Evîne.