COLEMÊRG - Hemverê tayînkerdişî qeyûmî û xespkerdişê îradeyê şarî, siba taxa Tekserî ya Meydanê Otogarê Colemêrgî de mîtîngêk yeno organîzekerdiş. Do siba bi hezaran welatijî ware de bêrê têhet. 

 

Dimayê ke qeyûm tayînê Şaredarîya Colemêrgî ame kerdiş, xeylêk bajaranê Kurdistanî ke çalakî ameyî destpêkerdiş, dewam kenê. Hemverê nê desteserkerdişî de do siba bi serkêşîya partî û sazgehan bi sloganê “Şaredarî yê şaran ê, ma do destûr nêdê desteserkerdişî” bêrê organîzekerdiş. Komîteyê Amadekar derheqê mîtîngê ke waştêne bajar de pê bîyarê, xebere da walîtî, ame dîyarkerdiş ke cewabê pozîtîfî ameyê girewtiş. Mitîng do siba taxa Tekserî de Wareyê Otogarî de saete 15.00ine de bêro organîzekerdiş.

 

Pêro hemşaredarî do Colemêrg de bê!

 

Hemserekê Pêroyî yê Partîya Têduştî û Demokrasîyî yê Şaran (DEM Partî) Tulay Hatîmogûllari û Tuncer Bakirhan, Hemserekê Pêroyî yê Partîya Herêmê Demokratîk (DBP) Çîgdem Kiliçgun Ûçar û Keskîn Bayindir, Hemserekê Kongreya Komelê Demokratîk (KCD) Berdan Ozturk, Verfekê Kongreya Demokratîke yê Şaran (HDK) Esengul Demîr û Cengîz Çîçek do tewrê mitîngî bibê.

 

Heto bîn ra, baskê “Rayîrşîyayîşê Demokrasî” ke vernîya mîtîngî qezayanê Şemzînan û Çêlê amebî destpêkerdiş, do beşdarê mîtîngî bibê. Baskê rayîrşîyayîşî mîyanê roje de do bireso merkezê Colemêrgî û şarî dawetê mîtîngê sibeyî kerdî.