Rozerîn Gultekîn

 

STENBOL-  Kênaya Dayîka Aştîye Ferîde Karsu ya ke cuya xo mîyanê têkoşînî de derbaz kerd Aynûr Taş, dîyar kerd ke dayîka aye seba kes dinyaya xo nêbedilno, bîya Dayîka Aştîye û dîyar kerd ke  wesîyetê aye "Fek têkoşînê xo ra vera medê” pey xo de verdaya. 

 

Dayîkê Aştîye hemverê polîtîkayê şerî yê dewlete yê vera şarê kurdî têkoşîn kenê. Xeylêk ci ra Dayîkê Aştîye yê ke seba aştîya komelî têkoşîn kerdêne û dinyaya xo bedelnayî û pey xo de mîrasê têkoşînî verdayî. Nînan ra yew dayîka ke temamê cuya aye  têkoşîn bî zî Ferîde Karsû bî. Ferîde Karsû ya ke aşma vîyarte de 71 serrîya xo de dinyaya xo bedelnaye, mîrasêk pîl ê têkoşînî pey xo de verda.  

 

Kênaya Ferîde Aynûr Taş têkoşînê dayîka xo Ferîde Karsu qal kerd. 

 

Dewa înan veşnayî, keyeyê înan îşxal kerdî

 

Aynure, dîyar kerd ke dayîka aye dewa Fişatî ya qezaya Farqînî ya Amedî de ameye dinya û vat ke serranê 90î de pêro dewe bi taybetî keyeyê aye û ya dayîka aye ameyo veşnayîş. Aynure vat, “Seba ke ma kurd bîyî dewa ma veşnayî. Dewa ma de çi estbî? Îşkence û heqaret kerdî. Ma rê persenê çira  kurdî şinê ko? Şîyayîşê koyî asan nîyo, la tutê ma seba nê zulmî verê xo danê koyan û wazenê azad biciwîyê. Seba ke dewa ma veşnayî, ma koçê Amedî kerd. Na rey birayê mi ame tepiştiş. Wexto ke birayê mi destbend kerdî, keyeyê dayîka mi û keyeyê mi de qereqol viraştî û keye ra vejîyayî. Ma xeylêk dej ant. Dayîka mi bi serran şî zindanê Amedî serdayîş. Dimayê ke birayê mi zîndan ra vejîya, na rey ma şî Bursa. Seba ke ma kurd bî, keye nêdayîne ma û vatêne 'şima terorîst ê'. Ma 7 serrî Bûrsa de çadirêke de mendî. Dimayê 7 serran ma Bursa ra koçê Stenbolî kerd.

 

'Wesîyetê dayîka mi bî ke ma fek têkoşînî ra vera nêdê'

 

Aynure, ard ziwan ke birayê aye Serhat dimayê ke şîyo Stenbol tewrê PKKyî bîyo û dima ra tepişyayo û wina vat: “Destpêk de 136 serrî cezaya zîndanî birayê mi Serhatî rê birnayî, dima ra îtîrazê dosya kerdî û cezaya ey bî 370 serrî. Dayîka mi bi hesretê birayê mi çimanê xo pada. Dayîka mi heta nefesê xo yê peyîn vat, Serhat. Dayîka mi tu wext zulm qebûl nêkerdêne û her tim aştî waştêne. Dayîka mi seba ke kes nêmiro, bî Dayîka Aştîye. Dayîka mi xeylêk zehmetî ant, la heta peynî têkoşînê xo dewam kerd.  Dayîka mi şîne ça qalê muhîmîyê têkoşînî kerdêne. Heta dilopê gonîya xo ya peyîn bi têkoşînê xo girêdaye bî. Seba ma zî wesiyatê aye bî ke ma fek têkoşînî ra vera nêdê û têkoşînê xo dewam bikerê.  Nika ez têkoşînê dayîka xo dewam kena. Dayîka mi cayê xo mi rê verda. Wesîyetê dayîka mi bî ke ma fek têkoşîn ra vera nêdê."

 

Aynure zî esteyê lajê xo gêrena

 

Aynure vat tutê aye sey embazî bîyê û wina qedêna: “Serranê 80yî de min û mêrdeyê mi destbend kerdî. Wexto ke lajê mi Berxwedan 3 aşme bî, destbend bîya. Destbendkerdişî de îşkence ma rê kerdî û cigêrayîşê zitî ma rê ame kerdiş. Dimayê ke lajê mi pîl bi, mi ra vat, 'Demo ke to dimayê îşkence şit da mi, xora to mi bi rêxistin kerd'. Lajê mi Mazlum Taş (Andok Farqîn) Efrîn de hemverê DAIŞî şer kerdêne û serra 2018ine de şehîd bî. Dimayê ke Tirkîya kewte Efrîn cenazeya lajê mi gor ra vetî. Ma nêzanê cenazeya ey berdîya ça. Ma muracat kenê, la vanê cenaze verê înan de nîya. Esteyê lajê mi ça de benê wa bibê, ez esteyê lajê xo wazena. Ez o her dem pey rêça lajê xo de bî."