WAN - Çalakîyê hemverê tayinkerdişê qeyûman ê seba şaredarîya Colemêrgî dewam kenê. Cinîyê wanijî dayî zanayîş ke polîtîkaya înkarî tecrîdî reyde girêdaye ya û mesajê pîlkerdişê têkoşînî yê seba her cayî dayî. 

 

Weçînayîşê 31ê Adare de şarê kurdî hemverê îqtidarî de bi dişminîyê kurdan xo wey keno de ser kewt. Bi stratejîyê şarê kurdî, AKP ver bi rijnayîşêk pîlî de şi. AKP vera ke demokrasî aver bero, bi vatişê; "nermkerdişî" hewl dano muxalefetî bigîro verê xo û kurdan tena verdo. Pêwa nê tehdîdan şarê kurdî Kurdistan de şîyî serê sindoqan. AKP ke netîceyê weçînayîşî rê tehemul nêkerd, bi rayîrê dizdî, talankerdiş, tayinkerdişî qeyûman ancî rojeve de yo. 

 

Şermezarkerdiş dewam keno

 

3yê Hezîrane de bi talîmatê Wezaretê Karê Zerreyî qeyûm tayînê şaredarîya Colemêrgî ke DEM Partî qezenc kerdibî, ame kerdiş. DEM Partîye bi 48.91 rayî şaredarîya Colemêrgî girewte. Hemverê îradeyê şarî de hemşaredarê Colemêrgî Mehmet Siddik Akişî destbend kerdî û dima ra 1ine Dadgeha Cezaya Giran ya Colemêrgî de 19 serrî û 6 aşmî cezaya zîndanî ci rê ameye birnayîş. Hemverê qerarî de Colemêrg de û xeylêk cayê bînan de çalakîyê hemverê qeyûman ameyî organîzekerdiş. 

 

'Ma do her wareyî de reaksîyon bimojnê'

 

Gulnaz Kaymaz da zanayîş ke ê do reaksîyonê xo dewam bikerê û wina vat: "Bi serran o heqê şarê kurdî wenê. Serekkomar qeyûman tayînê şaredarîyanê ma keno. Şarê kurdî ra vanê ke 'terorist'. Kam ma ra vano 'terorist' ê bi xo terorist ê. Şarê kurdî her wareyî de reaksîyonê nê çî dana. Ma do reaksîyonê xo dewam bikerê. Do şarê kurdî  tim hemverê nêheqî de vindero. Ma qeyûman qebûl nêkenê. Wa Homa qebûl nêkero."

 

'Şar qeyûman qebûl nêkeno'

 

Sarîye Dindar zî wina reaksîyon mojna: "Tayinkerdişê qeyûman zilm o, ganî nê zulmî nêkerê. Her het hemverê nê nêheqî de vejîyeno. Wan de vatî, ma mazbatayî nêdanê kesê ke bi ser kewtê û hemverê nê de zî nêrazîbîyayîşêk pîl ame mojnayîş. Eke na rey zî hewldayîşêk wina virazîyo, do kerra serê kerra de nêmano. Şar qeyûman qebûl nêkeno. "

 

'Raye namûs a, ma seba namûsî şîyî serê sindoqan'

 

Munife Koçak reaksîyon vera kesê ke hemverê qeyûman bêveng ê mojna û vat: "Raye namûs a, ma seba namûsî şîyî serê sindoqan. Wa kes Colemêrgî tenê nêverdo. Ganî her kes hemverê xespê îradeyî de reaksîyon bimojno. Ma tu wext tayînkerdişê qeyûmî qebûl nêkenê."

 

'Heta tecrîd nêwurzo do tayînkerdişê qeyûman dewam bikero'

 

Munife tewr peyîn wina vat: "Bi 3 serrî ra zêdeyêr o xebere Rayberê PKKyî Abdullah Ocalanî ra nîna girewtiş. Nika hemverê tecrîdî zîndanan de çalakî dewam kena. Zîndan de heqê tutanê ma yenê binpaykerdiş. Heta tecrîd nêwurzo, do tayînkerdişê qeyûman dewam bikero. Ganî ma şaredarîyê xo rê wayîr vejîyê. Ma rayê xo dayî, heqê ma yo. Ganî her kes îradeyê xo rê wayîr vejîyo."