Nazlican Nûjîn Yildiz

 

ÎZMÎR - Cinîyan reaksîyon vera xespkerdişê îradeyê Colemêrgî mojnayî û wina vatî: “Qeyûm, kelepçeyo ke îradeyê şarî rê bîyo yo. Hemverê polîtîkayê qeyûmî têkoşîn muhîm o.” Cinîyan sewbîna venga tewrbîyayîşê çalakîyê hemverê qeyûmî ameyê detpêkerdiş, kerdî.

 

Bi destê wezaretê karê zerreyî yê AKPyî 3yê hezîrane de hemşaredarê DEM Partî yê Colemêrgî Mehmet Siddik Akiş ame destbenkerdiş û dima ra zî qeyûm tayînê vera ci ame kerdiş. Hemverê nê de protesto dewam kenê û hemşaredar Mehmet Siddik Akişî rê 19 serrî û 6 aşmî ceza ameye birnayîş. Kurdistan û Tirkîya de hemverê qerarî de reaksîyonî her ke şinê zêde benê, xoverdayîşî dewam kenê. Îzmîr de zî cinîyan vera qeyûmî reaksîyon mojna û dîyar kerdî ke hemverê nê de bedel çi beno wa bibo do têkoşînê xo rê dewam bikerê. Cinîyan sewbîna venga tewrbîyayîşê çalakîyê hemverê qeyûmî pêro kesî rê kerdî.

 

'AKP weçînayîşan de derbêk pîl girewt'

 

Hemsereka DEM Partîye ya Îzmîrî Vezan Karabulut da zanayîş ke wrçînayîşê 31ê Adare de şar hemverê îqtîdarî de ser kewto û wina vat: “Serkewtişê Kurdistanî darbeyêk pîl da AKPyî ro. Şar reyke bîn wayîrê îradeyê xo vejîya û xeylêk bajar û qeza bi dest kerd. La hema dimayê nê hewl dayî ke hemşaredarê Wanî wezîfe ra bigîrê. La şar bi îrade û vindertişê xo Wanî peyser girewt.”

 

‘Ganî têkoşînêk topyekun bêro dayîş’

 

Endama Paştdayîşê Morî Berfîn Buyukertaş da zanayîş ke ganî vera qeyûman têkoşînêk topyekun bêro dayîş û wina vat: “Ganî perspektîfêk têkoşînî yê hempar bêro xêzkerdiş. Kurdistan de 9 serrî yo polîtîkaya qeyûmî est a. Weçînayîşê 31ê Adare de îradeyê şarî ser kewt. La faşîzmê AKP-MHPyî ancî hewl da îradeyê şarî xesp bikero. Ma nê faşîzmê Kurdistanî bi polîtîkayê qeyûmî dîyî. Kesêk ke hetê YSKî ra ameyo tesdîqkerdiş û weçînayîş qezenc kerdo, wezîfe ra yeno girewtiş. Wan de zî eynî çî kerdî. Şar vejîya kuçeyan û seba nê mecbûr mendî peyser biancê. Yê ke parê roşnvîr, demokrat, muxalîfan keweno pîlkerdişê têkoşînî yo. Hemverê faşîzmî ancax bi têkoşînî ma eşkenê serbikewê.” 

 

‘Bedel çi beno wa bibo ma amade yê’

 

Salîha Tektaş zî da zanayîş ke ê tayînkerdişê qeyûman şermezar kenê û wina vat: “Ma qeyûman qebûl nêkenê. Îradeyê şarî nêeşkeno bêro binpaykerdiş. Colemêrg de dimayê weçînayîşî ameyî qezenckerdiş, tayînkerdişê qeyûman bêhuqûqîyêk pîl o. Bedel çi beno wa bibo ma nê qebûl nêkenê. Ma est ê û ma do wayîrê dewaya xo bivejîyê.”

 

Seba çalakîya Îzmîrî vengdayîş

 

Endama Sendîkaya Tum-Emeklî-Sen Leyla Çalişkan zî dîyar kerd ke pêro îradeyê şarî yeno pelçiqnayîş û wina vat: “Ez sey kesêka DEM Partiyîje verê şarê Colemêrgî de ya. Îzmîr de hemverê qeyûmî de çalakî ame destpêkerdiş. Ma pêro şar bêrê têhet. Ma hemverê nê de vinderê. Çalakîya ma ya roniştişî est a. Wa pêro kes tewrê çalakîya Îzmîrî bibo. Wa paştdayîş bidê ke ê zî siba nê bêhuqûqî nêciwîyê.”